Хүүхдийн мөнгөн тэтгэмжийн асуудлаар Хөдөлмөр, нийгмийн хамгааллын яам, Цахим хөгжил, харилцаа, холбооны яам болон Үндэсний статистикийн хорооноос хэвлэлийн бага хурал хийж байна. Хэвлэлийн хурлын үеэр хүүхдийн мөнгөн тэтгэмжийн бодолтын аргачлалын талаар Үндэсний статистикийн хорооны дэд дарга Д.Лхамсүрэн  мэдээлэл өглөө.

Тэрбээр “Хүүхдийн мөнгийг зорилтод бүлгийн хүүхдэд  олгох тооцооллын аргачлалыг боловсруулахад 10 гаруй байгууллага, Дэлхийн банк хамтарч ажилласан. Энэ аргыг боловсруулахад дэлхийн 40 гаруй улс оронд ашигладаг орлогыг орлуулан тооцоолох аргачлалыг ашигласан. Энэхүү орлогыг орлуулан тооцох аргыг олон улсад зорилтод бүлгийг тодорхойлоход ашигладаг. Өрхийн орлого, хөрөнгийн мэдээлэлд үндэслэн аж байдлын үнэлгээг хийдэг. Энэ аргачлалын дагуу үнэлгээг хийсэн байгаа. Нийт өрхийн үнэлгээг хийж хүүхдийн мөнгийг олгох зорилтод бүлэг нь 91 хувь байгаа учраас 91 хувиар хүүхдийн мөнгө олгох босгыг тогтоосон. Аргачлал нь зөв ажиллаж байгаа гэдэгт бүрэн итгэлтэй байна. Үүн дээр гарч байгаа нэг эрсдэл нь аргачлалыг боловсруулж тооцоолол хийсэн цаг хугацаатай уялдаад иргэдийн мэдээллийн байдалд өөрчлөлт орох байгаа. Жишээ нь, үл хөдлөхөө борлуулчихаад дараагийн худалдан авсан хүнд очиж, гэрчилгээ дээр нэр тавигдах хүртэлх хугацаатай холбоотойгоор мэдээллийн чанарын асуудал гарахыг үгүйсгэхгүй. Хэрэв иргэдийн мэдээлэлд чанарын асуудал байвал төр, иргэн хамтран мэдээллийн чанараа сайжруулах, бодит байдлыг хангах нь зүйтэй” гэв.