Нохойд хазуулсан есөн иргэнд Сүхбаатар аймгийн Нэгдсэн эмнэлгийн сувилагчид галзуу өвчний эсрэг вакцины оронд сүрьеэгийн эсрэг вакцин андуурч хийсэн болохыг Эрүүл мэндийн сайд С.Чинзориг мэдээлсэн. Харин нохойд хазуулсан есөн иргэний биеийн байдал ямар байгаа талаар Сүхбаатар аймгийн Нэгдсэн эмнэлгийн дарга Д.Мөнхзулаас тодрууллаа.

      Тэрбээр “Нохойд хазуулсан иргэдийн биеийн байдал дунд зэрэг байгаа. Тэднийг эмчийн хяналтад оруулж, бүх төрлийн шинжилгээ хийж байгаа. Эрүүл мэндийн яам болон ХӨСҮТ, ЗӨСҮТ-ийн төвөөс мэргэжилтнүүд ирж, иргэдийг хамтарсан үзлэгт оруулсан. Эрүүл мэндийн яамны зүгээс нохойд хазуулсан иргэдийг хот руу зөөвөрлөх талаар ярьж байгаа. Гэвч иргэдийн санал, сэтгэгдлийг хүлээн авч шийдвэрлэнэ. Хамгийн гол нь Эрүүл мэндийн газраас манай эмнэлэгт буруу вакцин өгчихсөн юм. Тиймээс нохойд хазуулсан иргэдэд буруу вакцин хийсэн асуудал гарсан. Манай эмнэлэгт ч гэсэн мэргэжилтнүүдийн хариуцлагагүй үйлдэл буюу ирсэн вакциныг шалгаагүй гэх асуудал байгаа. Хэнд ямар хариуцлага хүлээлгэх нь хуулиар шийдэгдэнэ” гэлээ.