БНХАУ Афганистаны хойд хэсэгт газрын тосны өрөмдлөг хийх гэрээг Талибаны засгийн газартай байгуулжээ. Энэ нь Талибанчууд 2021 онд Афганистаны засгийн эрхэнд гарснаас хойш гадаадын томоохон компанитай газрын тос олборлох салбарт хамтран ажиллах гэрээ байгуулсан анхны тохиолдол боллоо.

   25 жилийн хугацаатай тус гэрээ нь бүс нутаг дахь Хятадын эдийн засгийн оролцоог харуулж байгаа юм.  Шинжаан Төв Азийн газрын тос, байгалийн хийн компани Амударьягийн сав газарт нефть олборлох аж. “Амударьягийн газрын тосны гэрээ нь Хятад, Афганистаны хооронд хэрэгжих чухал төсөл” гэж БНХАУ-аас Афганистанд суугаа элчин сайд Ван Юй Кабул хотод хийсэн хэвлэлийн хурал дээр хэлжээ.

     БНХАУ-ын төрийн өмчит компани Афганистаны зүүн хэсэгт  орших зэсийн уурхайн үйл ажиллагаанд хамтран оролцох асуудал мөн хэлэлцэгдэж байгаа аж. Бээжин Талибаны засгийн газрыг албан ёсоор хүлээн зөвшөөрөөгүй ч Афганистан нь Хятадын хэрэгжүүлж буй “Бүс ба Зам” санаачилгын чухал бүс нутагт тооцогдож буй.