Хумхаа өвчний халдвар авсан энхийг сахиулагчдын талаар цэргийн төв эмнэлгийн дарга Б.Энх-Од мэдээлэл хийлээ. Тэрбээр “Африкийн оронд энхийг дэмжих ажиллагаанд оролцож байгаа цэргүүдэд цэргийн нэг болон хоёрдугаар шатны хээрийн эмнэлэг ажиллаж байгаа. Үүнтэй холбоотой тэдгээрийн бие махбодь, ажиллагааны өмнөх бэлтгэл, эрүүл мэндийг цэргийн төв эмнэлгийн ажилчид хангаж ажилладаг. Энэ 20 жилийн хугацаанд энхийг сахиулах ажиллагаанд оролцсон алба хаагчдаас тодорхой хэмжээнд хумхаа өвчин илэрдэг. Харин судалгаа, шинжилгээгээр 10 шумуулын нэг нь ийм өвчинтэй гэж үздэг. Үүнийг дэлхийн хэмжээнд дээд зэргээр судалж, оношилгоо, эмчилгээ хийдэг. Хүнээс хүнд дамждаггүй өвчин. Энхийг сахиулах ажиллагаанаас ирсэн есөн цэргээс ийм өвчин илэрсэн. Гэхдээ долоо нь бүрэн эдгэж хяналтад орсон. Үлдсэн хоёр хүний нэг нь тус өвчний улмаас нас барсан. Нөгөө нь цэргийн төв эмнэлгийн эрчимт эмчилгээний тасагт нэн хүнд гэх оноштойгоор эмчлэгдэж байгаа.  Борооны улирлын сүүлд шумуулны явц идэвхждэг. Хазуулсан тохиолдолд энэ өвчин хүний биед хүрдэг. Ажиллагааны өмнөх бэлтгэл болон эх орондоо ирээд 14 хоногийн хугацаанд энэ өвчний эсрэг эмийг алба хаагчид хэрэглэдэг. Өөрөөр хэлбэл цэргийн албан хаагч үүрэг гүйцэтгэж байх хугацаандаа 58 удаа эмийг ууж хэрэглэдэг. Дэлхийн нийтэд үүний эсрэг вакцин гэж байдаггүй. Зөвхөн урьдчилан сэргийлэх эм л гэж байдаг. Энхийг дэмжих ажиллагаанаас ирж байгаа цэргүүдээс ийм төрлийн өвчин илэрч байсан ч бид 100 хувь эмчилж эдгээдэг байсан” гэлээ.