Монгол Улсын Засгийн газрын хуралдаанаас гаргасан шийдвэрүүдийг танилцуулж байна. Энэ үеэр Хууль зүй дотоод хэргийн сайд Х.Нямбаатар мэдээлэл хийлээ.

    Тэрбээр  “Хууль зүй дотоод хэргийн яамнаас боловсруулсан нийтийн болон хувийн ашиг сонирхлыг зохицуулах, урьдчилан сэргийлэх тухай хуульд оруулж байгаа нэмэлт өөрчлөлтийн төслийг дэмжиж, УИХ-д өргөн мэдүүлэх зөвшөөрлийг олголоо. Сүүлийн жилүүдэд  улстөрчдийн  нэр холбогдсон хөгжлийн банк, ЖДҮ зээл, нүүрсний хулгай гэх мэт төрийн болон орон нутгийн өмчит компанийн удирдлагууд, төрийн болон өмчит компанитай холбоотой ашиг сонирхлын зөрчил бүхий үйлдлүүдэд иргэд олон нийтийн дургүйцэл жигшил зэвүүцэл дээд цэгтээ хүрээд байна. Цаашид улс төрд нөлөө бүхий этгээд гэдэг ангилалд тавих хязгаарыг энэ хуульд шинэчлэн тогтооно. Улс төрд нөлөө бүхий этгээдүүдийн үйл ажиллагааг хориглох үйлдлийг маш тодорхой тусгаж өгье гэсэн агуулгаар Монгол Улсын Ерөнхий сайдаас өгсөн чиглэлийн хүрээнд хуулийн төслийг боловсруулсан. Цаашид иргэдийн төрд итгэх итгэлийг сэргээх, улс төрийн үйл ажиллагаа эрхэлж байгаа, нийтийн албанд ажиллаж байгаа хүмүүсийн ёс суртахууны хэм, хэмжээний дээд, доод хүрээ хязгаарыг зөв тогтооход энэ хуулийн төсөл томоохон үүрэгтэй. УИХ-ын гишүүн, Ерөнхий сайд, Засгийн газрын гишүүн, Аймаг, нийслэлийн Засаг дарга, тэдгээрийн эхнэр, нөхөр, хамтран амьдрагч, тэдгээрийн хүүхэд улс төрд нөлөө бүхий этгээд хэмээн ангилна.
    Тус ангилалд багтсан бол  Төрийн албаны удирдах албан тушаал хашихыг хориглоно.Төрийн болон орон нутгийн өмчит компани, тэдгээрийн оролцоотой компанийн удирдах албан тушаал, эрх бүхий албан тушаалд томилохыг хориглоно. Төрөөс хэрэгжүүлж байгаа бүх төрлийн төсөл хөтөлбөр, хөнгөлөлт баталгаа, тусламж, гадаадад болон дотоод зээлд хамрагдахгүй. Мөн бүх төрлийн тендер сонгон шалгаруулалтад аж ахуйгаараа оролцохгүй байхаар зохицуулсан” гэв.