Төв аймгийн Сэргэлэн сумын Хөшиг багийн Манзуширын хийд орчим өчигдөр 11:00 цагийн үед иргэн Г, О нар Богд хан-Уулын оргил Цэцээ гүнийн чиглэлд алхалт хийгээд буцах замдаа төөрчээ. Энэ үед иргэн О-ын бие нь өвдөж, явж чадахгүй болсон тухай дуудлагыг мөн өдрийн 18:50 цагт Онцгой байдлын газар хүлээн авсан байна.

    Ингээд иргэдийн байршлыг “What3words” аппликэйшинээр тодорхойлсноор аймгийн Онцгой байдлын газрын Эрэн хайх, аврах салбарын алба хаагчдыг очиход тухайн иргэд байгаагүй тул эрэн хайх ажиллагааг эхлүүлсэн. Эрэн хайх үеэр нийслэлийн Баянзүрх дүүргийн харьяат иргэн, 37 настай, эрэгтэй Г өөрөө уулнаас эсэн мэнд бууж, Цэцээ гүн амралтын газар ирсэн бөгөөд 37 настай, эрэгтэй О-ын цогцсыг 00:44 цагт Өгөөмөрийн-Ам гэх газраас олж, Цагдаагийн байгууллагад шилжүүлэн өгчээ.