Санхүүгийн зохицуулах хорооны хамт олон 2022 оны тайлангийн хурлаа хийж, жилийн ажлаа дүгнэлээ. Тайлангийн хурлыг нээж Санхүүгийн зохицуулах хорооны дарга Д.Баярсайхан “Санхүүгийн зах зээлийн тогтвортой хөгжлийг дэмжих зорилгоор тулгарч буй амаргүй сорилт бэрхшээлийг боломж болгохын тулд Санхүүгийн зохицуулах хороо илүү уян хатан, эрсдэлийг шингээх бодлогыг баримталж ажилласны үр шимээр 2022 он ололт амжилтаар дүүрэн, үр бүтээлтэй жил болж, урьдчилсан тооцооллоор зохицуулалтын салбарын зах зээлийн үнэлгээ, хөрөнгийн дүн ДНБ-ий 25.7 хувьд хүрч өсөхөөр байна.

         Зөвхөн хөрөнгийн зах зээл дээр гэхэд банкны реформ амжилттай хэрэгжиж системийн нөлөө бүхий оролцогчид болох Төрийн банк, Голомт банк хувьцаагаа олон нийтэд амжилттай санал болгон нийт 144.2 тэрбум төгрөгийг татан төвлөрүүлж, хөрөнгийн зах зээлийн үнэлгээ 1.5 их наяд төгрөгөөр өслөө. Биржийн бус зах зээл дээр 212.4 тэрбум төгрөгийн арилжаа хийгдсэн бол хөрөнгөөр баталгаажсан үнэт цаасны хоёрдогч зах зээлд энэ онд нийт зургаан хөрөнгөөр баталгаажсан үнэт цаас гарч 89.9 тэрбум төгрөгийг олон нийтээс татан төвлөрүүлсэн байна.

          Түүнчлэн төрийн өмчит компаниудын хувьчлалыг “Монголын хөрөнгийн бирж” ТӨХК эхлүүллээ гээд дурдвал хийсэн ажил ихтэй, амжилт бүтээл арвин жил болж байна. Зохицуулалтын бусад салбарын хувьд ч ололт амжилт дүүрэн. Тухайлбал, даатгалын тухай хуулийн нэмэлт өөрчлөлтөөр даатгагч баталгаа гаргах боломж бүрдсэнээр томоохон төсөл хөтөлбөрүүд, орон сууцжуулалт, жижиг дунд бизнесийн үйл ажиллагаанд батлан даагч болох боломж бий болж байна.

          Банк бус санхүүгийн үйл ажиллагааны тухай хуулийн шинэчилсэн найруулгын төслийг УИХ-аар дэмжиж, хэлэлцүүлгийн шатанд явахын сацуу банк бус санхүүгийн байгууллагуудын зээлдэгчдийн эрх ашгийг хамгаалах зорилгоор зээлийн үйл ажиллагааны зохицуулалтыг шинээр баталж, өр орлогын харьцааг 70 хувиас хэтрэхгүй байхаар хязгаарлалтыг тогтоолоо. УИХ-аас баталсан “Ногоон хөгжлийн бодлого”-ын хүрээнд ногоон санхүүжилтийн зах зээлийг нэмэгдүүлэх зохицуулалтын орчныг бүрдүүлснээр “ногоон даатгал”, “ногоон зээл”, “ногоон бонд” зэрэг ногоон бүтээгдэхүүн үйлчилгээнүүд ч нэвтэрч байна” гэдгийг онцолсон юм.

        Мөн тэрбээр ирэх ондоо бид зах зээлээ төрөлжүүлэн хөгжүүлж, техник технологийн дэвшлийг ашигласан, тогтвортой хөгжлийг дэмжсэн олон тулгуурт хүртээмжтэй, ухаалаг санхүүгийн зах зээлийг хөгжүүлэхийн төлөө анхаарч ажиллана гэлээ. Санхүүгийн зохицуулах хорооны Ажлын албаны дарга Т.Жамбаажамц энэ үеэр 2022 оны үйл ажиллагааны тайланг танилцуулсан юм.