Нүүрсний хулгайн хэрэгтэй холбоотойгоор өчигдөр нээлттэй сонсгол хийсэн. Нээлттэй сонсголын үеэр иргэд "Биднийг дотогш оруулсангүй. Төрийнхөн ард түмний дуу хоолойг сонссонгүй" гэх шалтгаанаар нүцгэн жагссан. Жагсаалын улмаас гурван иргэн осгосон байдалтай эмнэлэгт хүргэгдсэн талаар эх сурвалжууд мэдээлсэн. Энэ үеэр хэчнээн хүнээс мэдүүлэг авсан талаар ЦЕГ-ын Хэвлэл мэдээллийн төвийн дарга Г.Мөнхбаяраас тодрууллаа.

Тэрбээр “Эрүүл мэндийн байгууллагаас хүсэлт тавьсны дагуу жагсаалд оролцсон 30 иргэнийг эрүүл мэндийн байгууллагад хүлээлгэж өгсөн. Эмнэлгийн байгууллагын ачааллаас шалтгаалж 30 иргэнийг нэг дор үзлэг, оношилгоонд хамруулах боломжгүй байсан тул албадан саатуулах төвийнхөө байрыг ашигласан. Тиймээс Нийслэлийн Эрүүл мэндийн газраас албадан саатуулах төв дээр баг ажилласан. Тухайн иргэдийг хэн болохыг тогтоохыг тулд мэдүүлэг, тайлбар авсан. Ингэхдээ ХЭҮК, болон Нийслэлийн прокурорын хяналт дор хуулийн хүрээнд тайлбар, мэдүүлэг авч буцаасан. 30 иргэний наймыг нь эрүүл мэндийн тусламж үйлчилгээ авах шаардлагатай хэмээн үзэж Төрийн тусгай албан хаагчдын Нэгдсэн эмнэлэгт, 19-ыг нь  Нэгдүгээр эмнэлэгт хүргэсэн. Хоёр эмэгтэй иргэнийг эрүүл мэндийн үзлэгт хамрагдах шаардлагагүй хэмээн үзсэн учир буцаасан. Мөн насанд хүрээгүй нэг иргэнийг гэр бүлийнхэнд нь хүлээлгэн өгсөн. Тэднийг хүч хэрэглэн саатуулж, байцаагаагүй. Мөн талбайд жагсаж байсан иргэдийг хүч хэрэглэн албадан тараагаагүй. Харин талбайг чөлөөлөх зорилгоор шаардлага тавьж, иргэдийг түрж гаргасан. Цагдаагийн байгууллагад иргэд мөнгө авч жагссан гэх дуудлага, мэдээлэл бүртгэгдээгүй учир хэрэг бүртгэл нээгээгүй байна. Харин энэ сарын 4-ны жагсаалын үеэр Төрийн ордон руу дайрч, хашааг нь нураасан хэрэг дээр хэрэг бүртгэл нээж, шалгалтын ажиллагааг үргэлжлүүлж байгаа” гэв.