Нүүрсний экспорт, тээвэрлэлтийн асуудлаар нээлттэй сонсгол үргэлжилж байна. Энэ үеэр хуульч Х.Бат-ялалт байр сууриа илэрхийлж асуултаа асуулаа. Мөн УИХ-ын гишүүн С.Чинзориг асуултдаа хариуллаа.

    “Дэгийн талаар санал байна. Зургаан танилцуулгаа нэг болгочих, яагаад зургаан танилцуулга хийж, унтуулах гээд байгаа юм. Юмтайгаа танилцчихаад асуултаа асуух хэрэгтэй. Залуучууд бухимдалтай байна. Энэ хэлэлцүүлгийн санаачлан зохион байгуулж байгаа гишүүдэд баярлалаа. Хэлэлцүүлэг хийгдэж байгаа нь дэвшил юм. Өмнөх хэлэлцүүлгүүдээс өөр үр дүн гарсан хэлэлцүүлэг байгаасай гэж хүсэж байна. Ард иргэдэд хязгаарлалт тавилгүйгээр бүгдийнх нь үгийг сонсоосой гэж хүсэж байна. УИХ-ын гишүүд үг хэлэхгүй байх хэрэгтэй. Харин асуулт асуусан тохиолдолд хариулах чадамжтай бүтцийнх нь хүмүүс ирсэн юм уу гэдэг сонирхолтой байна. Өнөөдөр нэгэнт цаг гарган ирсэн учир хэлэлцүүлэг хийе. Үндсэн хуулиа мөрдөж,шударга байцгаая. Хууль хамаагүй гэж ярихаа болцгооё. Хуулийн дагуу биедээ шаардлага тавих хэрэгтэй. Энэ хэргийг шилэн байдлаар, нээлттэй шалгах хэрэгтэй. Хулгай хийсэн бол хариуцлагаа хүлээх ёстой” гэв.

Х.Бат-ялалтын асуултад УИХ-ын гишүүн С.Чинзориг хариулт өглөө “Зургаан мэдээллийг нэгтгэж, нэг хүн ярих боломжгүй. Бидний зүгээс QR код уншуулж бүх мэдээлэл авах боломжийг олгосон. Хэрэв та бүхэн мэдээллийг бүгдийг нь сонсох шаардлагагүй гэвэл энэ зургаан мэдээллээс зарим мэдээллийг нь сонсоод, асуулт хариултдаа орцгооё.

Х.Бат-ялалт: Эрүүгийн хянан шийдвэрлэх ажиллагаа явагдаж байгаа. Өнөөдөр бид  гэмт хэргийн гэрч, магадгүй хохирогчдын мэдүүлэг энд яригдах гэж байна. Энэ нээлттэй сонсгол хэр зэрэг үнэн бодитой үр дүнд  хүрэх гэж байгаа сонсгол юм бэ. Хэрэг хянан шийдвэрлэх ажиллагаанд байгаа хүмүүс ямар түвшинд байгаа талаар танилцуулга хийхгүй юм уу. 35 хүн цагдан хорьсон гэсэн ч ихэнхийг нь буцаагаад гаргачихсан байна.  

С.Чинзориг: Оролцогчдод мэдээлэл өгөхөд өнөөдрийн хийж байгаа ерөнхий хяналтын сонсгол бол холбогдох албан тушаалтны мэдээлэл сонсож тайлбар, хариулт авдаг сонсгол. Яг тухайн асуудлаар УИХ-аас байгуулсан хяналт шалгалтын түр хорооноос хийх мэдээлэл сонсгол бол гэрч дуудаж, нотлох баримт цуглуулдаг, нотлох баримтат үнэлгээ хийдэг тухайн асуудалд хяналт шалгалт хийдэг юм. Ерөнхий хяналтын сонсгол тухайн хэргийг хянан шалгаж байгаа. Түр хорооноос зохион байгуулж хийдэг гэрч дууддаг сонсголоос өөр шүү.