Нүүрсний хулгайн хэрэгтэй холбоотойгоор 10:00 цагаас нээлттэй сонсгол хийхээр болсон. Гэвч иргэдийн зүгээс "Бидний үг хэлэх цагийг  албан тушаалтнуудаас хойно тавьсан байна. Бид эхлээд үгээ хэлмээр байна. Сонсголыг Их танхимд зохион байгуулахыг шаардаж байна" хэмээж зохион байгуулалтгүй болж буйг шүүмжилсэн. Иймээс нээлттэй сонсголыг 13:00 цаг хүртэл хойшлуулсан билээ. Энэ үеэр УИХ-ын гишүүн Т.Доржханд “Нээлттэй сонсголыг УИХ-ын Тамгын газраас хариуцаж, зохион байгуулж байгаа. С.Одонтуяа гишүүн бид хоёр сөрөг хүчний төлөөлөл болж ирсэн. Нээлттэй сонсголыг санаачилж гишүүдээр гарын үсэг зуруулсан хүн нь би. Хулгай хийсэн хэмээн хардагдаж буй гишүүдийн үгийг сонсох ёстой. Нээлттэй сонсгол зохион байгуулалтаас болж үр дүнгүй болох магадлалтай байна. Би нээлттэй сонсголоор нүүрсний хулгайн хэрэгт холбогдсон гишүүдэд хариуцлага тооцдог тогтолцоотой болгоё гэж бодсон” гэлээ.