Нийслэлийн прокурорын газраас  “Тавантолгой Транс” ХХК-ны гүйцэтгэх захирал  Д.Дагвадорж, “МБМтранс” ХХК-ны гүйцэтгэх захирал  Г.Мөнхдөл, “ Зун Мен” ХХК-ны гүйцэтгэх захирал эмэгтэй  Ши Шао Хуа  нарыг  яллагдагчаар нэг сар цагдан хорих таслан сэргийлэх арга хэмжээ авхуулах  саналыг шүүхэд ирүүлжээ.

     Хан-Уул дүүргийн Эрүүгийн хэргийн анхан шатны шүүхэд энэ сарын 16-ны өдөр саналыг хэлэлцээд Д.Дагвадорж, Г.Мөнхдөл , Ши Шао Хуа нарыг  нэг  сар цагдан хорихоор шийдвэрлэлээ.  Ингэхдээ Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.3 дахь заалтад заасан "Гэмт хэрэг дахин үйлдэх талаар үндэслэл бүхий баримт,  байгаа  бол яллагдагчийг цагдан хорих шийдвэр гаргана" гэснийг   үндэслэсэн байна.

·Д.Дагвадоржийг  Монгол Улсын хилээр  2.185.795.47 тонн нүүрсийг экспортолж, зөрүү 361.498.33 тонн нүүрсийг хууль бусаар хяналтгүй 373 тээврийн хэрэгслээр 1624 удаагийн давтамжтайгаар хилээр  гаргаж, нууцаар, хууль бусаар нүүрс хулгайлсны улмаас улсад их хэмжээний хохирол учруулсан үйлдэлд,

·Г.Мөнхдөлийг 1242 том оврын ачааны автомашиныг 4433 удаагийн давтамжтай  “Гашуунсухайт” ын хилийн боомтоор хоосон гаргаж нүүрс хулгайлсны улмаас улсад их хэмжээний хохирол учруулсан гэх үйлдэлд,  

·Ши Шао Хуаг  185 том оврын ачааны автомашиныг 482 удаагийн давтамжтай Гашуунсухайтын боомтоор хоосон гаргаж нүүрс хулгайлсны  улмаас улсад  их хэмжээний хохирол  учруулсан гэх үйлдэлд яллагдагчаар татаж, Эрүүгийн хуулийн тусгай ангийн 17.1дүгээр зүйлийн 2 дахь хэсгийн 2.3 дахь  заалтад зааснаар эрүүгийн хэрэг үүсгэн, мөрдөн байцаалтын ажиллагааг үргэлжлүүлэн явуулж байна. Яллагдагч нарын холбогдсон гэмт хэрэг нь нийгэмд эдийн засгийн хувьд  аюултай байгаагаас гадна яллагдагч нар хэрэгт  ач холбогдол бүхий  баримтуудыг  өөрчлөх, устгах, мөрдөн шалгах ажиллагаанд саад учруулж болзошгүй гэж үзэж  шүүх  шийдвэрээ гаргажээ.

Эх сурвалж: Баянгол, Хан-Уул, Сонгинохайрхан дүүргийн эрүүгийн хэргийн анхан шатны шүүхийн тамгын газар