Сүхбаатарын талбайд 12 дахь өдрөө үргэлжилж буй жагсаал цуглаантай холбогдуулан Цагдаагийн ерөнхий газраас нөхцөл байдалтай холбоотой мэдээлэл өглөө.  Жагсаал, цуглаанд өдөрт дунджаар 800-2500 орчим иргэд оролцож, арванхоёрдугаар сарын 08-ны өдрөөс эхлэн давхардсан тоогоор 56 иргэн суулт хийж байна.

      Тус жагсаалын үеэр цагдаагийн байгууллагад гэмт хэргийн шинжтэй 14 гомдол мэдээлэл бүртгэгджээ. Үүнээс мөрдөн байцаалтын хэрэг үүсгэн яллагдагчаар татан шүүхэд шилжүүлэх саналтай шилжүүлсэн нэг, хэрэг бүртгэлтийн хэрэг нээн шалгаж байгаа тав, гэмт хэргийн шинжгүй үндэслэлээр найман  гомдол мэдээллийг хэрэг бүртгэлтийн хэрэг нээхээс татгалзаж шийдвэрлэсэн. Зөрчлийн шинжтэй 28 дуудлага, мэдээлэл бүртгэгдсэнээс 25-ыг нь шийдвэрлэж, ажиллагаанд гурван зөрчил байна.

      Жагсаал цуглааны үед жагсагчдын зүгээс чулуу, гарын доорх бусад материалыг ашиглан эсэргүүцэл үзүүлснээс найман алба хаагч гэмтэж, бэртсэнийг яаралтай эрүүл мэндийн тусламж, үйлчилгээ үзүүлэх зорилгоор эмнэлгийн байгууллагад хүргүүлж, цагдаагийн нэг алба хаагчийн хамрын яс хугарсан байна.

      Мөн энэ оны арванхоёрдугаар сарын 10-ны өдөр согтууруулах ундааны зүйл хэрэглэсэн иргэд жагсагчид руу дайрч биед нь халдах оролдлого хийх явцад цагдаагийн байгууллагаас шуурхай таслан зогсоож, нийт 15 иргэнд холбогдох шалгалтыг явуулж, найман иргэнийг эмнэлгийн байгууллагад хүлээлгэн өгч, анхан шатны тусламж үзүүлжээ.