Нүүрсний хулгайн хэрэгт холбогдсон УИХ-ын гишүүдийг олон нийтэд зарлахыг шаардсан жагсаалд оролцож буй жүжигчин У.Цогбаярыг олон нийтийн сүлжээгээр “Хятадын эрлийз” хэмээн шүүмжилж байгаа. Тэгвэл 23:30 цагийн үед түүний дүүгийн гэрийнх нь хаалганы гадна “Хятадын удам, хужаа, Монголоос зайл” хэмээн бичиж, газ шахсан бичлэг олон нийтийн сүлжээгээр ил боллоо.

     Энэ талаар жүжигчин У.Цогтбаяраас тодруулсан юм. Тэрбээр “Миний дүү хоёр хүүхэдтэйгээ амьдардаг. Тэд айж, сандарч, сэтгэл зүй нь хямарчихсан уйлалдаад байна. Бид камерын бичлэг шүүлгэхээр цагдаа дуудчихсан байгаа. Хэн намайг болон дүүг минь хятад, эрлийз хэмээн доромжилж, гүтгэж байгааг ойлгохгүй байна. Надад ургийн бичиг байгаа. Бид хятад биш” гэв.

      Мөн тэрбээр өөрийн цахим хуудастаа "Төрсөн ганц охин дүүгийн минь гэр рүү газ шахсан байна. Надаар оролд. Нярай хүүхэдтэй өнчин дүүг минь бүү зовоо. Өвдөг сөгдөөд гуйя" гэжээ.