"ХӨГЖЛИЙН БЭРХШЭЭЛ БА ТЭГШ ХҮРТЭЭМЖ-2022” ЭРДЭМ ШИНЖИЛГЭЭНИЙ 10 ДАХЬ УДААГИЙН ХУРАЛ АМЖИЛТТАЙ ЗОХИОН БАЙГУУЛАГДЛАА

2022-12-01, 357

Хөгжлийн бэрхшээлтэй хүний Олон Улсын эрхийг хамгаалах өдөр буюу арванхоёрдугаар сарын 03-ны өдрийг тохиолдуулан “Хүртээмжтэй хөгжлийн дэвшилттэй шийдлүүд: хүртээмжтэй, эрх тэгш байдлыг дэмжихэд инновацын үүрэг” уриан дор хөгжлийн бэрхшээлтэй хүний бүхий л салбарт судалгаа явуулж буй төр болон төрийн бус байгууллага, эрдэм шинжилгээний байгууллага, их дээд сургуулийн оюутан, эрдэмтэн, багш, судлаач, оюутнуудын оролцоо, хамтран ажиллах боломжийг нэмэгдүүлэх, туршлага солилцох, судалгаа, шинжилгээний ажлыг хөгжүүлэх зорилгоор жил бүр зохион байгуулагддаг хөгжлийн бэрхшээл судлал- салбар дундын шинжлэх ухааныг хөгжүүлэх эрдэм шинжилгээний хурлыг “Хөгжлийн бэрхшээл ба тэгш хүртээмж-2022” сэдвийн хүрээнд арваннэгдүгээр сарын 30-ны өдөр амжилттай зохион байгууллаа.

Хуралд нийт 60 гаруй судалгааны өгүүлэл ирснээс шилдэг найман илтгэлийг хэлэлцүүлж, салбар салбараа төлөөлсөн долоон шүүгчдийн санал нэгдсэнээр дараах шагналт дөрвөн байр шалгарлаа.

Үүнд:

I байранд: Хөгжлийн бэрхшээлтэй хүүхдийн сэргээн засах хөгжлийн төвийн Н.Цэсэнжав ахлагчтай баг- Гуяны арын булчинг сунгах төхөөрөмж зохион бүтээж эмчилгээнд ашигласан үр дүн

II байранд: Монголын Үндэсний Их сургуулийн Анагаах ухааны сургуулийн багш Ө.Мөнхтуул, Т.Батдулам нар- Хөгжлийн бэрхшээлтэй суралцагчдын бэлгийн цогц боловсролын мэдлэг, хандлагыг судлах нь

III байранд: Эх Хүүхдийн Эрүүл мэндийн Үндэсний төвийн П.Норовням ахлагчтай баг- Хүүхдийн хөгжлийн бэрхшээлийг үнэлэхэд олон улсын үйл ажиллагааны ангиллыг ашиглах нь

IV байранд: Тээврийн цагдаагийн албаны Хяналт шинжилгээ, үнэлгээ хариуцсан ахлах мэргэжилтэн, цагдаагийн хошууч Ж.Энхбаатар- Хөгжлийн бэрхшээлтэй иргэдийг замын хөдөлгөөнд ялгаварлахгүйгээр оролцуулах нөхцөлийг бүрдүүлэх нь

Нэгдүгээр байр эзэлсэн бүтээлийг Хөдөлмөр, халамж үйлчилгээний ерөнхий газраас залуучуудыг дэмжих хүрээнд Старт-ап төсөлд хамруулах мөн тусгай байр эзэлсэн бүтээлийг Монголын хараагүйчүүдийн үндэсний холбоо санхүүжүүлэхээр болсон нь энэхүү эрдэм шинжилгээний хурлын бодит үр дүн юм.Нийгмийн чухал сэдвүүдийг хөндөж өгүүллэг ирүүлсэн болон амжилттай илтгэлээ хэлэлцүүлсэн, сонирхож сонссон нийт оролцогч та бүхэнд талархал илэрхийлж, цаашдын эрдэм судлалын ажилд нь амжилт хүсье.

"ХӨГЖЛИЙН БЭРХШЭЭЛ БА ТЭГШ ХҮРТЭЭМЖ-2022” ЭРДЭМ ШИНЖИЛГЭЭНИЙ 10 ДАХЬ УДААГИЙН ХУРАЛ АМЖИЛТТАЙ ЗОХИОН БАЙГУУЛАГДЛАА

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.