Дархан-Уул аймгийн Дархан сумын гуравдугаар багийн нутаг дэвсгэрт “Тэс Петролиум” ХХК-ийн шатахуун агуулах сав дэлбэрч, нэг иргэн нас барсан тухай бид өмнө нь мэдээлсэн. Энэ талаар Дархан-Уул аймгийн Хэвлэл мэдээлэл, олон нийттэй харилцах мэргэжилтэн Ц.Тунгалагаас тодрууллаа. Тэрбээр “2000 тонн шатахуун агуулах сав шатаж байгаа тухай дуудлага 09:21 цагт Онцгой байдлын газарт ирсэн. Шатаж буй агуулахад 600 гаруй тонн шатахуун байсан. Тиймээс гал 10-12 цагийн дараа шатаж дуусах тооцоолол бий. Өнөөдөр Улаанбаатар, Сэлэнгэ, Орхон аймгаас нэмэлт хүч ирсэн. Онцгой байдлынхан нэмэлт хүчээр ирэхдээ ус болон зориулалтын хөөстэй ирж байгаа. Гал гарах үед тухайн газар гурван иргэн ажиллаж байсан. Нэг иргэн эмнэлэгт хүргэгдэх замдаа амиа алдсан. Хоёр иргэнийг одоогийн байдлаар олоогүй байгаа. Онцгой байдлын Аврах ангийнхан галын бүрэн хяналтад авсан. Мөн өнөөдөр сургууль, цэцэрлэгийн хүүхдүүдэд танхимаар хичээл ороогүй. Харин маргааш сургалтын үйл ажиллагаа хэвийн үргэлжилнэ" гэлээ.