Сангийн яамны төрийн нарийн бичгийн дарга, “Эрдэнэс таван толгой” компанийн бүрэн эрхт төлөөлөгч Ж.Ганбат ажлаа аваад 35 хоногийн хугацаанд хийсэн ажлаа тайлагналаа.

Тэрбээр “Би ажлаа аваад 35 хоногийн хугацаанд хийсэн ажлаа тайлагнаж байна. Эрдэнэс таван толгой” компанийн үйл ажиллагааг төв оффисоос уурхайн үйл ажиллагааг бүрэн хянаж байгаа. Засгийн газрын 362 дугаар тогтоол батлагдсанаас хойш 341.5 сая ам.долларын үнэлгээ бүхий 3.7 сая тонн нүүрсийг борлууллаа. Үүнээс зөвхөн арваннэгдүгээр сард 205.5 сая ам.долларын мөнгөн дүн бүхий 2.3 сая ам долларын нүүрс борлуулж, 1.5 сая тонн нүүрс экспортоллоо. Уурхайн камерын бичлэгийг сайжруулж төв оффисоос машины дугаарыг хардаг болно. Мөн автомашинд байршил тогтоогч байршуулж ажиглалт хийнэ.  

     Аравдугаар сарын 5-ны өдөр “Эрдэнэс таван толгой” компани урьдчилж авсан орлого буюу өмнө нь мөнгө аваад хэрэглэсэн 603 сая ам.долларын нүүрсээ ачуулах ёстой. Үүнээс 152 сая ам.долларын өрөнд багтаж нүүрсээ ачуулсан. Өнөөдрийн байдлаар экспортыг өдөрт 110,9 мянган тонн сарын өмнөхтэй харьцуулахад хоёр дахин нэмэгдүүлсэн. Мөн уурхайгаас Цагаан хад хүртэлх тээврийг 3-4 дахин нэмэгдүүлсэн. Дунджаар 500 тээврийн хэрэгслийг нэмэгдүүлсэн нь уртын тээвэрт ажлын байр бий болгож, орлого нэмэгдүүлэн ажиллаж байна” гэв.