Долоо хоног бүр “Надад ирээгүй хайр” киноныхоо шинэ ангийг хүлээж, Бүжинтэй хамт Алдарыг хайрлаж, хадам ээждээ таалагдахын тулд хичээж, байгааг нь харж үе үехэн бачуурч, найзуудтайгаа, хайртай залуутайгаа өнгөрүүлэх нандин мөчүүдийг нь харж заримдаа догдолж суугаа болов уу. Үзэгчдийн сонирхлыг татаад буй тус олон ангит киноны гэнэн, гэгээхэн Бүжин охины дүрд тоглосон жүжигчин Н.Нархажидтай ярилцлаа. Үзэгчид түүнийг “Хавтаст хэрэг”, “No ruels”, “Ахан дүүс”, “Үнэр” тэргүүтэй уран бүтээлүүдэд тоглож байснаар нь сайн таних билээ.

-Танд энэ өдрийн мэнд хүргэе. “Надад ирээгүй хайр” олон ангит кино нь үзэгчдээс эерэг үнэлгээ авсаар байна шүү дээ. Гол дүрийн уран бүтээлчийн хувьд сэтгэгдэл ямар байгаа вэ?

                -“Надад ирээгүй хайр” олон ангит кино маань нийт 20 ангитай. Дийлэнх үзэгчид зөв сэдэв хөндсөн, хөөрхөн уран бүтээл байна гэж байгаа. Мөн ОХУ-ын киног дуурайсан гэж хэлсэн хүмүүс ч харагдаж байсан. Бидний хувьд зохиогчийн эрхийг хүндэлж оросын “Гэсэн ч би хайртай” киноны албан ёсны эрхийг нь авч хийсэн. Уран бүтээлийн зураг авалт дөрвөн сар үргэлжилсэн.  Кино багийнхан тун сэтгэл хангалуун, юманд саатахгүйгээр уран бүтээлдээ ажилласан юм шиг санагдсан. Бүжингийн дүрд тоглох саналын Б.Жаргалсайхан найруулагч, “Хүлэгү” пикчерсийн н.Сумъяа эгчээсээ авсан. Орос хувилбарыг нь үзэж эхлэхээсээ л гол дүр дээр нь намайг бодож, төлөвлөсөн гэсэн. Миний хувьд орос киног нь үзэж байгаагүй. Зураг авалт эхлэхээс өмнө үзье гэж бодсон ч хайрцаглагдчих юм шиг санагдаад үзээгүй.

-Биднийг анх ярилцаж байхад та “Дурлалт охины дүр бүтээхийг хүсдэг” гэж хэлж байсан шүү дээ. Бүжингийн дүр Алдарт чин сэтгэлээсээ хайртай болж байгаа гэнэн, цайлган охины дүр шиг санагдсан. Та дүрийнхээ талаар яриач, хүсэж байсан дүр дээрээ ажиллах ямар байв?

                -Киноны санал ирэх үеэр би өөр ажилтай байсан юм. Зохиол маань ч жаахан хүнд санагдсан. Дүрийн минь үүрэх ачаа хүнд санагдаж байсан учраас өөрийгөө чадах эсэхэд бага зэрэг эргэлзсэн. Жүжигчдийн уншлагын үеэр зохиолдоо бүр ч дуртай болж, дүрийн саналаас татгалзсан бол харамсах байж гэж бодсон. Нөхөр Алдарын дүрд ангийн маань найз тоглосон. Оюутан байхаасаа нэгнийгээ мэддэг учраас хамтарч тоглоход аль алинд нь амар байсан. Хүсэж, мөрөөдөж байсан дурлалт бүсгүйн дүрийг ангийнхаа залуутай хамтарч гаргах боломж олдсонд үнэхээр баяртай байгаа.

-Анх зохиолоо уншихдаа Бүжингийн дүрийг хэрхэн төсөөлсөн бэ, төсөөлсөн шигээ дүрээ гаргаж чадсан уу?

                -Зохиолоо уншихдаа Бүжинг “Ямар сонин бүтэлгүй, сонин охин бэ” гэж бодсон. Тэр үед төсөөлсөн төсөөллөө найруулагчийнхаа тусламжтайгаар бүтээж чадсан.

-“Хавтаст хэрэг” киноны үеэр хийсэн ярилцлагаас хойш багагүй хугацаа өнгөрсөн байна шүү дээ. Энэ хугацаанд уран бүтээлийн олз омог арвин байв уу?

                -“Хавтаст хэрэг” бол 2021 онд сургуулиа төгссөнийхөө дараа орж ажилласан хоёр дахь олон ангит кино байсан. Тус уран бүтээлээс хойш бүрэн хэмжээний болон олон ангит кинонд тоглож, туршлага хуримтлуулж, олон хүнтэй танилцаж, сайхан хүрээллийг бий болгосон байна. “Тамгагүй  төр” жүжгийн багт нэгдэж, тогтмол ажилтай болсон. Жүжигчин, бүжигчнийхээ хувиар тус уран бүтээлд оролцож байгаа. Одоогийн байдлаар аравдугаар сард Япон Улсад тоглох тоглолтынхоо бэлтгэх ажилд орсон байна.

-Хамгийн дурлаж ажилласан, таныг сорьсон уран бүтээл нь юу байв?

                -Залуу уран бүтээлчийн хувиар оролцсон уран бүтээлүүдээсээ олон зүйл сурч, ойлгож байгаа. Тэр дундаас дүрийнхээ мөч бүрийг хайрлаж “Ямар гэнэн, цагаахан хөөрхөн юм бэ” гэж бодож тоглосон нь “Надад ирээгүй хайр” олон ангит киноны Бүжингийн дүр байгаа.

-“Надад ирээгүй хайр” киног аль насныхан хамгийн их үзээсэй, үзээд юу ойлгоосой гэж хүсэж байгаа вэ?

                -Бүх насныхан үзэхэд тохиромжтой. Зохиолоо уншиж байхдаа эмэгтэйчүүд маань илүү шимтэж үзэх болов уу гэж таамагласан. Эмэгтэй хүний тэсвэр тэвчээр, хүнийг ямар үнэнчээр хайрладаг уу гэдгийг харж болох юм шиг санагддаг. Хайр дурлал бол зөвхөн аз жаргал гэсэн үг биш, хүнээс итгэл, тэсвэр тэвчээр, хүлээлтийн шаарддаг гэдгийг харуулах байх. 

-Бүжин маань ээж болсон шүү дээ. Ээжийн дүрд тоглох ямар байв, юун дээр хамгийн их анхаарсан бэ?

                -Одоо бол 19 настай үе гарч байгаа. Цаашид 25, 39 настай бүжин гарна. Ингээд харахаар нэг хүний амьдралыг бүтэн харуулах уран бүтээл болж байгаа юм. Хүний туулаад гардаг зовлон бэрхшээл, жаргал зовлонг харуулсан уран бүтээл. Би өөрөө ээж болж амжаагүй байгаа учраас ээжийн дүрд тоглох амаргүй байлаа. Миний охины дүрд тоглосон Нандин-Эрдэнэ охин үнэхээр мундаг жүжигчин. Үнэхээр авьяастай, төрөлхийн жүжигчин гэж түүнийг л хэлэх байх. Уулзсан даруйдаа намайг “Ээжээ” гэж дуудсан учраас нэгэндээ хурдан дасаж, ойлголцсон.

-“Надад ирээгүй хайр” олон ангит кинонд харьцангуй залуу уран бүтээлчид тоглож байгаа санагдсан. Кино багийнхныхаа талаар ярихгүй юу?

                -20 ангитай олон ангит киноны гол дүрд тоглох ачааг үүрэх нь миний хувьд маш том хариуцлага байсан. Би алдаа гаргавал тус уран бүтээлд оролцож байгаа олон хүний хүч хөдөлмөрийг үгүй хийчих юм шиг санагдаж, эмээсэн. Өмнө нь ажиллаж байсан гол дүрүүдээс илүү олон зураг авалтад оролцсон учраас арын албаныхантайгаа илүү ойр, дотно болсон. Кинон дээр зөвхөн жүжигчид харагддаг ч бидний дүрийг илүү тодруулдаг хүмүүс нь арын албаны уран бүтээлчид байдгийг сайн ойлгож, тэдэндээ талархсан.

-Таны хувьд Бүжингийн дүрээс сурсан, өөртөө шингээсэн зүйл юу байв?

                -Бүжингийн дүрд тоглосноороо өөр нэг өөртэйгөө танилцсан юм шиг санагдсан. Зураг авалт үргэлжилсэн дөрвөн сарын хугацаанд 19-39 нас хүртэлх амьдралыг туулж үзсэн. Тэр хугацаанд хамгийн жаргалтай, зовлонтой бүх мөчийг багахан ч гэсэн мэдэрч үзлээ. Олон зүйлийг ойлгож, мэдэрлээ. 20 ангитай олон ангит киноны гол дүр гэх хүндтэй үүргийг даагаад гарсандаа баяртай байна.