Тун удахгүй нээлтээ хийхээр зэхэж буй “BEE” театрын бүтээл “Тусгал” драмын жүжигт тоглосон залуу жүжигчин Б.Баяржаргалтай ярилцлаа. Тэрбээр 2016 онд СУИС-ийг жүжигчин мэргэжлээр төгссөн юм.

-Сайн байна уу. Таны хувьд “Тусгал” драмын жүжгийн дунд насны буюу Умагийн дүрд тоглож байгаа юм байна. Өмнө нь ямар уран бүтээлд тоглож байсан бэ гэдгээс яриагаа эхэлье?

     -Сургуулиа төгссөнөөс хойш Монгол телевизэд жүжигчнээр ороод, продюсер болтлоо ажилласан. Тэгээд өнгөрсөн зун телевизээсээ гараад, жүжигчний мэргэжлээрээ ажиллаж байгаа. Миний хувьд “Эхиймаа” уран сайхны киноны хоёрдугаар гол дүр болох Нандиагийн дүрд ажилласан. Кино дэлгэцийн уран бүтээл учир суралцах зүйл их байсан. Бид чинь СУИС-ийг тайзны жүжигчнээр төгсдөг болохоор их туршлага болсон. Дараа нь дөрвөн ангит уран сайхны кино өнгөрсөн зун хийж дуусгасан. Удахгүй нээлтээ хийх байх. Түүний дараа “ВЕЕ” театрт гурван эмэгтэй хүний жүжгийн Умагийн дүрд ажиллаад явж байна.

-Дүрийн хувьд гурван өөр насны эмэгтэй юм билээ. Дүрүүдийн онцлог ямар байгаа вэ?

   -“Тусгал” драмын жүжиг нь 30 гаруй, хорь гаруй настай болон дөнгөж сургуулиа төгсөж, амьдралд хөл тавьж байгаа охины дүр гээд гурван өөр насны эмэгтэйн тухай гарсан. Хэдийгээр гурван өөр насных боловч хүмүүстэй ойр, энгийн юмнаас нэгнээсээ суралцдаг.Тэр ч утгаараа бид аль болох нийгэм болон хүмүүстэй энгийн байдаг л гурван насны хүмүүс нэг цэгт уулзаад ямар шийдэлд хүрч байна гэдгийг мөн харна. Ямар ч насны байсан бид биенээсээ суралцаж байдаг гэсэн санааг гаргахыг зорьж байгаа.

-Дэлгэц, тайзны уран бүтээл мэдээж ялгаатай байх. Энэ хоорондын ялгааг уран бүтээлд орохдоо хэрхэн мэдэрсэн бол. Хүн хүний ойлгож, мэдрэх зүйл өөр байдаг шүү дээ?

      -Тайз болон дэлгэцийн уран бүтээл ялгаатай. Тайзных нь уран бүтээлч эхнээсээ авахуулаад дуустал дарааллын дагуу бүх сэтгэлззүйг өөр дээрээ мэдэрч дуусгадаг. Нэг зүйлд зорьсон бол тэр шугамаа алдахгүйгээр зорилгоо биелүүлэхийн тулд бүхнийг тайзан дээр даван туулаад явна. Кино уран бүтээл бол аль ч төрлийн хэсгээс эхэлж болно. Гэнэт төгсгөлийн хэсгээс эхлэх болбол би төгсгөлийн хэсэгт орох болно. Тэгэхээр аль алинд нь суралцах зүйл байгаа. Тайзны уран бүтээл илүү хүмүүст сонсогдож хүргэхийн тулд бид үйлдлээ илүү том, хэлэх гэж байгаа яриагаа илүү хурц гаргах ёстой бол кино бол илүү энгийн байхыг шаарддаг юм билээ.

-Ихэнх залуу уран бүтээлч санхүүгийн бэрхшээл, ажлын байр хомс зэрэг шалтгаанаар уран бүтээлд орж чадахгүй, урлагийн салбарыг орхих тал байдаг. Таны хувьд энэ тал дээ ямар бодолтой байдаг вэ?

     -Мэдээж СУИС-д орсон хүн бүр төгсөөд гараад явдаггүй. Шигшигдэж, тунаж үлддэг. Тэгээд амьдрал дээр гарахдаа ажлын байр хомс, ганцхан драмын театртай байна гэдэг. Одоо бол цаг арай өөр болж байгаа. Учир нь олон театр шинээр гарч ирж байна. Монголд жижиг театрууд нээгдэж эхэлж байна. Мөн сошиал ертөнцөөр уран бүтээлээ хүргэж болж байна гээд эрэл хайгуул хийх юм бол боломжгүй зүйл байхгүй. Тэгэхээр залуу уран бүтээлчдэд ажлын байр олдохгүй зүйл харьцангуй багассан гэж бодож байна.

-Амьдралд нь хамгийн их нөлөөлсөн хүн хэн бол. Аав, ээж хоёрынхоо хэнийг илүү дуурайсан бол?

     -Би юм бүрийг сониучирхдаг. Хэрэв би сониуч зангаа орхих юм бол тэр газраа тэг зогсчих юм шиг санагддаг. Тэгэхээр олон зүйлийг сонирхож, хүмүүсээс суралцдаг. Хүмүүсийн мэдрэмжийг өөртөө хамт мэдрэхийг хүсдэг. Өөртөө мэдрэмжийг цуглуулдаг. Ингэснээрээ өнөөдрийн би бий болж байгаа байх. Би зуун хувь хүнтэй адилхан гэхгүй байх. Мэдээж гэр бүлээсээ суралцдаг. Багаас минь урлагийн хүн болох замналыг маань тавьсан. Ээж минь болохоор эмэгтэй хүн ямар байх вэ гэдэгт өөрөө үлгэрлэсэн. Ээж маань их ажилсаг, цэвэрч нямбай, эмэгтэй хүн ямар байх ёстой юм, яг тийм хүн байдаг. Ааваасаа харин урлагийн талын зүйлсийг суралцдаг. Мөн багш нар минь надад олон зүйлийг заасан. Тэгэхээр бага залуу гэлтгүй хүн бүрээс суралцахыг хичээдэг.

-Цаашид зорьж, төлөвлөсөн зүйлээсээ бидэнтэй хуваалцаж болох уу?

   -Одоогоор “Тусгал” жүжигтээ амжилттай оролцох юм сан гэдэгт анхаарлаа хандуулж байна. Дараа нь бол дэлгэцийн уран бүтээл, моно жүжгийн ажил байгаа. Гэхдээ одоогоор урдах зүйлээ дуусгах хүсэлтэй байгаа учир одоохондоо оролцохгүй байгаа.

  -Ярилцсанд баярлалаа.

  -Баярлалаа