Та нарт ямар ч үед сэтгэлд чинь оршиж байдаг, тэр хүнд л бүхнээ хэлчих юм бол бүх зүйл болчих юм шиг санагддаг хүн байдаг уу. Надад яг тийм найз бий. Арван жилийн ширээнээс нөхөрлөсөн түүнтэй хэчнээн жилийг ч хамтдаа үдсэн юм бэ дээ. Заримдаа ээжээсээ ч илүү найзаасаа айна. Юу ч болсон хамгийн эхэнд хэлэх гэж зүтгэнэ. Найзын минь зөвлөгөөг ямар ч сэтгэл зүйч, эрдэмтэн гүйцэхгүй юм шиг санагдаж, хамгийн зөв хариулт, гаргалгааг түүнээс л хүлээнэ. Тийм дотно түүнтэй ажил, амьдралын эрхээр удаан уулзалгүй байж байгаад саяхан уулзтал өчигдөрхөн сургуулийнхаа үүднээс салсан мэт хэчнээн дотно, ойр байсан гэж санана. Магадгүй бид буурал үстэй болсон ч сэтгэлдээ үргэлж жаахан охид шиг энэ л янзаараа уулзан тэврэлдэж, ач, зээ нарынхаа талаар ярьж, инээлдэх байх даа ч гэж бодоход он жилийн хойно ч, өнөөдөр ч найз минь миний хувьд хэчнээн эрхэм, чухал, мөнхүү хамгийн түшигтэй хань юм бэ гэдгийг улам ихээр мэдэрч байлаа.

      Жаргалтай мөчийг нь гэрэл зургийн хальс шиг л сайхан дурсамж болгож хадгалахыг, гунигтай үед нь нулимсыг нь арчих “алчуур” нь байх гэж хичээдэг юм, бид нэгнийхээ. Тэр намайг үргэлж баярлуулан зориод ирдэг шиг, би ч мөн түүнийг баярлуулахыг, жаргалтай байлгахыг, дуртай зүйлээ аваад баярлан хөөрөхийг нь харах дуртай. Учир нь, үе ч гэлээ яг тооцвол би эгч хэрнээ яг л жаахан хүүхэд шиг түүнд эрхэлж, ээж, том эгч шиг түүний ухааныг  гайхдаг юм. Хамтдаа зайрмаг идэж, тоглож явсан охин “Хэзээ чухам ийм том болчихсон юм бол” гэж бодогдоно. Заримдаа түүн шиг минь үргэлж сайхан сэтгэлээрээ жигүүрлэж, бусдад аз жаргал түгээдэг дулаахан хүн олон байгаасай гэж боддог юм. Тийм найзтай байхад хорвоо ямар гэгээтэй, жаргалтай байдаг гэж санана. Намайг гэрэлтүүлэхээр, надад жаргал нэмэхээр ирсэн хүмүүсийн хамгийн тод өнгө, тухтай хүн нь найз гэдгийг би түүнээс л мэдэрсэн.

            Заримдаа бусдыг хэтэрхий их хайрлаад өөрийгөө мартчихдаг найздаа өөрийгөө хайрлах ёстойг нь сануулж л байхгүй бол өрөөлийн төлөө гүйсээр амьдралаа өнгөрөөж мэдэх л хүн дээ. Эрх дураараа, дэврүүн, гэгээнээс гэгээн зангаараа дүүлэн, жаргалтай амьдраарай, найз минь. Үргэлж дулаан илчээрээ төөнөж, сэтгэл дүүргэж байдагт баярлалаа.