СЭТГҮҮЛЧ ТАНЫ ШИРЭЭНИЙ НОМ "МОНГОЛЫН СЭТГҮҮЛ ЗҮЙН НЭВТЭРХИЙ ТОЛЬ"

2025-05-12, 1097

Монгол Улсын Их Сургуулийн сэтгүүл зүй тэнхимийн багш, шинжлэх ухааны доктор профессор Л.Норовсүрэн “Монголын сэтгүүл зүйн нэвтэрхий толь” номын нээлт өнгөрсөн баасан гарагт болсон билээ.

Тэрбээр энэхүү номынхоо тухай “Энэ ном онолын ойлголт, нэр томьёо болон сэтгүүл зүйн түүхэн үйл явц, намтраас бүрдсэн. Нийтдээ 1641 толгой үгээс бүтсэн. Нэвтэрхий толь бичиг нь тогтсон, шалгарсан, хэрэглээнд нэвтэрсэн хүлээн зөвшөөрөгдсөн байх ёстой юм байна. Нэг хүн толь бичиг бичнэ гэж байхгүй юм байна. Урьд өмнө эрдэмтэн судлаачдын хийсэн онолын нэр томьёог нийлүүлж,, цуглуулж нэг цэгээс уншуулах мэдлэгийн сан гэж ойлгосон. Анхны сониноос эхлүүлээд өнөөдөр гарч байгаа хэвлэлийн мэдээ хүртэл багтаан оруулсан” гэв.

Энэ үеэр МУБИС-ийн Сэтгүүл зүй тэнхимийн эрхлэгч М.Одмандах "Орчин үеийн нэр томьёо, бидний өмнө олж хараагүй байсан бичвэрүүдийг нэгтгэж оруулж өгчээ. Энэхүү нэвтэрхий толь залуу сэтгүүлч, оюутнуудын сурах бичиг болохоор бүтээл болжээ. Монголын сэтгүүл зүйн түүхтэй холбоотой, өмнө судалгааны ажилд орсон ч төдийлөн олны хүртээл болоогүй бүтээлүүдийг оруулсан нь залуу сэтгүүлчдийн сэтгүүл зүйн түүхийг мэдлэгт ихээхэн хувь нэмэр оруулах байх" гэсэн юм.

Харин МУИС-ийн Шинжлэх ухааны сургуулийн Нийгмийн ухааны салбарын профессор, доктор (Sc.D) М.Зулькафиль "Нэвтэрхий толийг нэвтэрхий хүн л бичдэг. Улс орны сэтгүүл зүйн түшинг нэвтэрхий толиноос мэдэх боломжтой. Нэвтэрхий толь бол олон жилийн настай байдаг. Өнөөдөр энэхүү нэвтэрхий толь бичигт залуучуудын мэдэхгүй ахмад үеийн сэтгүүлчдийн намтар, бүтээлийг гаргаж өгсөн нь гарцаагүй нэгэн онцлог болж байна.Сэтгүүл зүйн бүх төрлийг оруулсан сайхан бүтээл болжээ" хэмээв.

Ингээд бид уншигч танд тус номын тухай хүргэе.

Л.Норовсүрэн багш энэхүү номынхоо өмнөтгөлд "Толилуулан бүхий "Монголын сэтгүүл зүйн нэвтэрхий толь" бичгийг зохиогч МУИС-д сэтгүүл зүйн багшаар ажилласан 40 жилд хуримтлуулсан мэдлэг туршлага болон дотоод, гадаадын эрдэмтэн судлаачдын онол, арга зүйн ном зохиолд түгээмэл дурдагдаж тогтвортой мэдлэг болж хэвшсэн ойлголтуудад тулгуурлан бичлээ...Энэхүү нэвтэрхий толь бичгийн бас нэгэн зорилго нь хэрэглэгчдэд сэтгүүл зүйн шаардлагатай нэр томьёо, онол, түүх, арга зүйн тухай мэдлэгийг нэг дороос богино хугацаанд өгөх, сэтгүүлч, судлаачдын онол, түүхийн суурь мэдлэгийг нэмэгдүүлэх, дэлхийн сэтгүүл зүйн онолын сэтгэлгээний хөгжлийн явц, чиг хандлагатай танилцуулахад чиглэгдсэн болно..." гэжээ.

Энэхүү нэвтэрхий толь бичиг "Аалзны тор" гэх үгийн тайлбараас эхэлжээ. Тэр дундаа бүр ийм нэртэй нийтлэл дурдан эхэлж байна.

"ААЛЗНЫ ТОР" ("Өдрийн сонин". 2002. № 66,73,149,150,152,156). Шинэ зуун гарснаас хойш Монголын нийгэмд хамгийн их шуугиан тарьсан нийтлэлийн нэг. Уг нийтлэлд Монголын эдийн засгийн судсыг гадаадын хэдхэн том компани, банк санхүүгийн байгууллагууд барьж байдаг, манай эрх баригчид тэдэнтэй сүлбэлдэн уул уурхайн бүтээгдэхүүнээрээ барьцаалан их хэмжээний зээл авч, түүнийгээ дотоодын компаниудад хөрөнгө оруулалт хэлбэрээр тарааж завсраар нь ашиг олж баяждагийг илчилсэн юм.

Нийт зургаан цуврал болж "Өдрийн сонин", "Үг" сонинд нэгэн зэрэг гарсан энэ нийтлэлийн эхний "Аалзны тор I" нь "Алт худалдан авах ямар ашигтай вэ", "Зуучлагч байгууллага гэж хэн бэ", "Монголын зэсийг хэн зуучилдаг вэ", "Тэдний санхүүжилт хэрхэн бүрддэг вэ", "Жеральд Металл" яагаад гэнэт томров", "Асар том зээлийн мөнгө хаанаас босов", "Дараагийн багц мөнгө хэрхэн хуваарилагдав", "Центрпойнтын зодоонтой зээл ямар холбоотой вэ", "Худалдаа хөгжлийн банкны хувьчлал юу болов", "Өөр ямар сонин байна", "Монгол банк ямар бэрхшээлтэй учрав", "Төгсгөл" гэсэн 12 хэсгээс бүрджээ... гэхчлэн тус нийтлэлийн тухай "Монголын сэтгүүл зүйн нэвтэрхий толь" номоос уншаарай.

Ийнхүү номын тайлбар цааш "АБМАД", "АВИРМЭД", "АВ" ТЕЛЕВИЗ", "АВТОРИТАРИ ОНОЛ", "АВЬЯАС"... зэргээр үргэлжлэх бөгөөд сэтгүүл зүйгээс юу л мэдэж болмоор байна, бүгдийг багтааснаараа баялаг, өргөн ном болжээ. Түүнчлэн сэтгүүлчийн ширээний ном байхад гарцаагүй мэдлэг, мэдээллээр дутахгүй, хоцрохгүй, мэдэхгүйн зовлонгоосоо бага ч болов ангижрах тусыг хүргэж байгаагаараа энэ номын ач тус оршиж байна. Алдарт сэтгүүлч нарыг ч энэхүү тольд танилцуулж, бүтээл туурвилаас нь дурдсан байгааг ч дуулгахад таатай байна. Тухайлбал, Соёлын Гавьяат зүтгэлтэн Дүгэрийн Амбасэлмаа сэтгүүлчийн тухай эндээс товч тодорхой мэдээллийг авч болох бөгөөд тухайн сэтгүүлч Монголын сэтгүүл зүйн түүхэнд юу хийж бүтээж, ямар бүтээл туурвилыг үлдээснийг тольчлон харах боломжтой байна. Тэгэхээр уншигч танд бүх талын мэдээллийг энэхүү толь бичиг өгөхөөс гадна үргэлжлүүлэх судлах ном товхимол, эх сурвалжыг ч зааж өгч буйгаараа онцлог юм.

СЭТГҮҮЛЧ ТАНЫ ШИРЭЭНИЙ НОМ "МОНГОЛЫН СЭТГҮҮЛ ЗҮЙН НЭВТЭРХИЙ ТОЛЬ"

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.