УИХ-ын дэд дарга Х.Булгантуяа мэдээлэл өглөө. Тэрбээр "Өнөөдөр Монгол Улсын Ерөнхий сайд УИХ-аас гаргасан өөрийг нь огцруулах тухай шийдвэрийг Үндсэн хуулийн цэцэд өгсөн асуудлаар Үндсэн хуулийн цэц их суудлын хуралдаанаар хуралдах гэж байна. Ерөнхий сайдыг огцруулсан асуудлыг Ерөнхий сайд анх удаа өөрөө Үндсэн хуулийн цэцэд хандаж байгаа асуудал болж байна. УИХ үндсэн хуулиараа 18 эрхийг хэнтэй ч хуваалцахгүйгээр мэдэх эрхтэй байдаг. Үүний нэг бол Засгийн газартай хариуцлага тооцох, Засгийн газрыг томилох эрх байдаг. Өнөөдөр УИХ энэ шийдвэрийг гаргасныхаа төлөө буруудаж байна. Тухайн өдөр УИХ-ын даргаар хуралдаан даргалуулахгүй гэж олон хүн шаардлага тавьсны үүднээс УИХ-ын дэд даргын хувьд ажил үүргээ гүйцэтгэсэн намайг бас үндсэн хууль зөрчсөн гэж гомдол гаргасан. Та бүхэн санаж байгаа бол 2025 оны аравдугаар сарын 16-ны өдөр ирцийг дөнгөж нээгээд, ирц бүрдэхгүй тэр цаг үед Төрийн байгуулалтын байнгын хорооны хурлын дараагаар шууд Үндсэн хуулийн цэцэд гомдол гаргасан байсан. Өөрөөр хэлбэл, гаргах гэж байгаа шийдвэр, томьёолол нь үндсэн хууль зөрчсөн байна гэж. УИХ-ын даргаар Г.Занданшатар дарга ажиллаж байхдаа, 2019 онд Үндсэн хуулийн нэмэлт өөрчлөлт оруулсны дараагаар одоогийн Ерөнхийлөгч, тухайн үед Ерөнхий сайдаар ажиллаж байсан У.Хүрэлсүх даргыг огцруулахаар яг адилхан томьёоллоор санал хураалт явуулж болохгүй байна гэж С.Бямбацогт сайд өөрөө тухайн үед горимын санал гаргаад, дэмжигдсэн. Үүнтэй яг адил үндсэн хуулийн зүйл заалтаар, дэгийн зүйл заалтаар санал хураалт явуулсан чинь өөрийнх нь хүссэнээр санал гараагүйгээс болоод Үндсэн хуулийн цэцэд хандсан. Хэрэв Монгол Улсын Ерөнхий сайдыг огцруулья гэдгээр санал хураалт явуулья гээд санал хураалт явуулаад, огцорсон бол мөн ахиад л намайг Үндсэн хуулийн цэцэд өгөх байсан байх. Энэ бол аль нэг томьёололтой зууралдаад байгаа биш тухайн 111 гишүүнээс 71 гишүүн өөрийг нь огцруулахыг дэмжсэнд л өнөөдөр УИХ-ын шийдвэрийг хүндэтгэхгүй, процесстэй нь зууралдуулж сүүлийн шийдвэрт нь сэтгэл хангалуун бус байна гэж харж байна" гэв.