С.Шаарийбуу гуайн охин Ш.Алтантуяа Малайз Улсад амиа алдаад 19 жил болж, С.Шаарийбуу 19 дэх жилээ Малайз Улсын шүүх хуралд оролцоод ирсэн. Саяхан түүнд уй гашуудлаа илэрхийлсэн нэгэн иргэн өөрийн цахим хуудастаа "Малайз Улсаас С.Шаарийбуу гуайд олгосон хохирлын мөнгийг нь Ерөнхий сайд асан Сү.Батболд, Гадаад харилцааны сайд асан Лу.Болд, Консулын газрын дарга асан Я.Ариунболд нар авлига хэлбэрээр авсан. Харин С.Шаарийбуу гуайд нэг ч төгрөг ирээгүй" хэмээн нийтэлсэн нь олны анхаарлыг татаад байгаа юм. Гэтэл дээрх нэр бүхий хүмүүсийн зарим нь С.Шаарийбуу гуайд чадахынхаа хэрээр тусалж, дэмжиж байсан. Ийм худал мэдээлэл гаргаж, гүтгэж, доромжилсон Д.Сэрдарам гэх хүн нотлох баримтуудаа аваад шүү дээр очоорой. Би өөрийнхөө нэр төрийг сэргээнэ" хэмээсэн юм. Ш.Алтантуяагийн хэргийг замхруулахын тулд Малайзын Засгийн газраас авлига авсан эсэхээ мөн хүний амийг хөнөөсөн этгээдийг цаазын ялаар шийтгэж болохгүй гэж яриагүй нь үнэн бол Элчин сайдын суудлаасаа бууж байгаад шалгуулах хэрэгтэй. Хэрвээ тэгж чадахгүй бол хэн нэгнийг цахимаар албан тушаал, эрх мэдлээрээ айлган сүрдүүлээд өнгөрч байгаатай ялгаагүй зүйл болно. Үнэхээр үнэний төлөө явж, С.Шаарийбууд чадахаараа тусалж байсан бол түүнийгээ мөн ил тод болгож, үнэний төлөө явдаг, ажилладаг хүнд албан тушаал тийм ч чухал биш гэдгийг харуулж, энэ нийгэмд бодит жишиг тогтоомоор байна. 

Л.БОЛД: УВАЙГҮЙ ГҮТГЭЛЭГ ТҮГЭЭСЭН Д.СЭРДАРАМ ГУАЙ НОТЛОХ БАРИМТУУДАА ШҮҮХ ДЭЭР АВААД ОЧООРОЙ

      Харин Европын холбоонд суугаа Монгол Улсын элчин сайд Л.Болд өөрийн цахим хуудастаа “Хэн нэгэнд нь намайг гүтгэж доромжлох хэрэгцээ гарсан юм байлгүй дээ. Нөгөө үнэн гутлаа өмсөх зуур худал уул давдаг гэдэг шиг. Сошиал ертөнцөд өчигдрөөс “Сэрдарам Дамдин” нэртэй хаягаас намайг хүний санаанд багтамгүй гэмт хэрэгт гүтгэж, хүний ёсноос гадуур гаж сэтгэлээр доромжлон гүтгэжээ. Ухамсарт бүх амьдралаа хүний эрхийн төлөө тэмцэлд зориулсан миний хувьд энэхүү аймшигт аллагын талаар өөрийн байр сууриа ямагт тодорхой илэрхийлж ирсэн. Монголын төр хохирсон иргэнийхээ төлөө арслан бар шиг арсалдах учиртай юм. Миний зүгээс С.Шаарийбуу гуайг боломжийнхоо хирээр дэмжиж төсөөлшгүй зовлонтой нөхцөлд үүрч байгаа ачааг нь нимгэлэхэд анхаарч, хүчин зүтгэж ирсэн нь бодит үнэн юм. Ялангуяа тухайн үед энэ асуудалд намайг ойртуулж, Шаарийбуу гуайтай танилцуулсан Батчимэг гишүүн агсан Монголын төр мэдээллийн дутагдалтай байсан эхний жилүүдийг төөрөгдлийг өөрчлөхөд онцгой үүрэг гүйцэтгэсэн билээ. Энэ талаар бид хамтдаа их хурал дээр олон асуудлыг хөндөн тавьж байсныг тод санаж байна. Монгол төрийн гарамгай зүтгэлтэн түүний гэгээн дурсгалыг санаж би шүүхээр нэр төрөө албан ёсоор сэргээлгэх болно. Энэхүү увайгүй гүтгэлэгийг түгээсэн Сэрдарам гуай нотлох баримтуудаа шүүх дээр аваад очоорой.

     Би нэг удаа Малайзид Олон улсын хүний эрхийн хуралд зориуд хувиараа очиж талийгаачийн амь насыг эрх баригчдаас нь нэхсэн юм. Цаазын ялын эсрэг хурал байсан бөгөөд, энэ хэргийн жишээн дээр цаазын ялаар халхавч болгож хуулийн цоорхойг ашиглаж байгааг анхааруулсан юм. Малайз Улсад алуурчинд цаазын ял оноосон багөөд түүнийгээ гүйцэтгэхийн оронд Австрали руу зугатах боломж өгч, чөлөөтэй байлгаж, ял завшиж байгааг тайлбарсан. Хэрэв тэр этгээд бүх насаар хоригдох ялтай байсан бол Австрали улс гэмт хэрэгтнийг хүлээлгэн өгөхөд бэлэн гэдгээ илэрхийлсэн бөгөөд тэр жигшүүрт этгээд зохих шийтгэлээ хүлээж, хэргийн эрүүгийн хуулийн процесс дуусгавар болж дараагийн шатны асуудлууд шийдэгдэх байсан юм. Энэ талаар намайг гэмт хэрэгтнийг хамгаалсан мэт баахан гүтгэж олон хүнийг төөрөгдүүлж улс төр хийж байсныг санаж байна. Зөвхөн их хурал дээр ч биш, төр засгийн бүх шатанд тодорхой асуудлууд тавьж шийдвэрлүүлсэн байдаг, ялангуяа талийгаачийн хүүхдүүдийн ирээдүйг хамгаалах чиглэлээр. Хохирогчийн мөнгийг завшсан, өрөөндөө барилцсан ч гэх шиг юу вэ, дотор муухайрчлаа. Ингэж хүнийг гүтгэж болдог юмуу. С.Шаарийбуу гуайтай хамтдаа хэвлэлийн уулзалт хийхэд бэлэн байна” гэсэн байв. 

С.ШААРИЙБУУ: МОНГОЛ УЛСЫН ЗАСГИЙН ГАЗАР ИРГЭНИЙХЭЭ ЭРХИЙГ ХАМГААЛДАГГҮЙ НЬ ҮНЭН ШҮҮ ДЭЭ

      Харин түүний энэхүү пост орсны дараахан С.Шаарийбуу гуай мөн өөрийн цахим хуудастаа “Намайг өнөөдөр баривчлах юм биш үү. Өчигдөр охиноо дурсаж, Гандан хийдэд ном уншуулаад зул асааж өнжсөн юм. Харин олон нийтийн сүлжээнд Д.Сэрдарам багш нэгэн бичвэр бичсэн юм байна. Тэр хүний буруу ч гэж юу байх вэ. Гэтэл нэг хэсэг хүмүүс над руу дайрч бичиж байна, зарим нь ярьж байна. “Бусдын нэр төрд халдсан, шүүх цагдаад хандана” гэж. Намайг сураггүй болбол баривчлуулсан байна гэж бодоорой. Гурван “Болд” энэ хэргийн эсрэг ажилласан гэж хардахаар үйлдэл, үйл явдлууд өрнөсөн байдаг шүү дээ. Би олон жил үүнийг ярьж хэлж яваа. Манай хуулийн байгууллагаас нэг удаа тэднийг дуудаад тайлбар авчихдаггүй юм. Л.Болд гэхэд өнөөдөр гадаадад улсад Элчин сайд хийж байна. Я.Ариунболд гэхэд хил хариуцсан бас л том албан тушаал хашиж байна. Сү.Батболд ойлгомжтой. Би үе үеийн Гадаад харилцааны сайд нартай уулзаж хэлдэг. Б.Батцэцэгтэй хэд хэд уулзсан. “Яагаад та нар энэ хүмүүсийг албан тушаал дэвшүүлж, шагнаад байдаг юм бэ” гэхэд хариулдаггүй юм. Монгол Улсын Засгийн газар иргэнийхээ эрхийг хамгаалдаггүй нь үнэн шүү дээ" хэмээсэн байдаг.

Д.СЭРДАРАМ: НАМАЙГ ХУУЛИЙН БАЙГУУЛЛАГААС ДУУДАЖ, ШАЛГААГҮЙ

Тэгвэл бид С.Шаарийбуу гуайн охины хохирлын мөнгийг Сү.Батболд, Лу.Болд. Я.Ариунболд нар Малайз улсаас авлигаар авсан байж болзошгүй гэх мэдээлэл цахим хуудастаа нийтэлсэн Д.Сэрдарамыг хуулийн байгууллагаас дуудаж, дээрх хэрэгтэй холбоотойгоор шалгасан эсэх талаар тодрууллаа. Тэрбээр “Одоогийн байдлаар намайг хуулийн байгууллагаас шалгаагүй. Хэрвээ дуудвал би өөрийнхөө цахим хуудаст оруулсан мэдээллийнхээ хүрээнд шалгуулахад бэлэн байна. Дээрх нэр бүхий хүмүүс хуулийн байгууллагад намайг шалгуулах хүсэлт гаргавал цагдаагаас дуудах байх” гэсэн юм.