32-ын тойргоос Ногоон нуурын "Сод Монгол"-ын Шатахуун түгээх станц хүртэл урт дараалал үүсчээ. Яваад очтол, шатахуун тээвэрлэдэг машин ирчихсэн, Түгээгч нь "Одоо л шатахуун ирж байна" гэнэ. Яагаад дорхноо дуусчихаад байгаа, мөн иргэдэд талоноор үйлчилж буй эсэх талаар асуухад "Шатахуун ирээд л 2-3 цагийн дотор дорхноо дуусчихаад байна. Иргэд ч их хэмжээгээр авч байна. Манайх талон гэхгүй дугаарласан иргэдэд өгч байгаа" гэж товчхон хариулав.

     Ингээд үргэлжлүүлэн дугаарлаж байгаа жолоочдын хамгийн эхний иргэнтэй ярилцлаа. Тэрбээр "Хоёр цаг орчим л хүлээж байна. Азаар шатахуун дууссан гээд оочер багатай байхад нь ирсэн. Одоо ингээд урт дараалал үүсчихлээ. Өчигдөр шөнө хороололд гурван цаг оочерлоод шатахуун авч чадалгүй харьсан. Энд евро 92 л өгч байна" гэлээ. Харин дарааллын дунд орчимд дугаарлаж буй машины жолооч эмэгтэй "Ирээд, гурван цаг гаруй оочерлож байна. Одоо л шатахуун ирж байна. Шатахууны талон зарж буй хүмүүс байгаа л юм байна лээ. 50-300 мянган төгрөгийн лимиттэйгээр зарж байгаа сурагтай. Би ч талон аваагүй, дугаарлаад очиход өгөх байлгүй дээ. Шатахууны үнэ өсөлттэй байхад үнэтэй талон авах чинь хэцүү байна шүү дээ. Бид зам дээр гарч түгжрэлд нэг гацна, шатахуундаа дугаарлана, арай л хэтэрхий байна" гэж байв.

     Биднийг ийн ярьж байхад арынх нь машины жолооч эрэгтэй бууж ирснээ "За байз ямар удаж байна аа, өөр тийшээ явдаг юм бил үү. Энд одоо шатахуун авч чадалгүй дуусчих юм биш биз дээ" гээд халаасандаа гараа хийгээд нааш цааш холхино. Замын хажууд дугаарлалт үүссэн болохоор хаа нэг хажуугаар нь өнгөрөх машинуудаас "Ингэж нэг урсгал хааж зогсмооргүй байна" гэх нь ч сонстоно.

   Ингээд бид цааш явсаар 32-ын тойргийн "Шунхлай" Шатахуун түгээх станц хүрэв. "Шатахуун байна уу" гэж асуугаад зөрөх хоёр, гурван машинаас бусдаар ямар ч оочер дараалал алга. Шатахуун түгээгч эмэгтэй "Шатахуун дууссан, хэзээ ирэхийг мэдэхгүй байна. Манайд ирээд 24 цаг болдог шатахуун хоёр цагт л дуусчихаад байна" гэв.  Шатахуун асуусан жолооч залуу "Та ядаж 20 мянгад шатахуун өгчихөөч" гэхэд түгээгч үргэлжлүүлэн "Үнэхээр шатахуун байхгүй.  Иргэд их хэмжээгээр авч байна. Энгийн үед ирдэг хэмжээнээс их ирээд байхад л дуусчихаад байна. Манайх заавал талоноор үйлчилнэ гэхгүй, оочерын дагуу л өгч байгаа" гэнэ. Ийнхүү хоорондоо ойрхон колонкуудад нэг нь огт шатахуун өгөхгүй, дуусчихсан, нөгөөд нь иргэд урт дараалал үүссэн дүр зурагтай байна.

      Тэгвэл энэ нөхцөл байдлын талаар Аж үйлдвэр, эрдэс баялгийн сайд Г.Дамдинням өчигдөр "Манай Улсад шатахууны зохиомол хомсдол үүсээд байгаа. Улаанбаатар хотын иргэд өдөрт 950-1200 тонн шатахуун хэрэглэдэг. Гэвч өнөөдрийн байдлаар өдөрт 1800 тонныг нийлүүлээд байхад иргэдийн дугаарлалт буурахгүй байна. Нэгдүгээрт, ОХУ манай улсын шатахууны 92 хувийг дангаараа хангадаг. Дайн байлдааны нөхцөл байдлаас шалтгаалаад одоогийн байдлаар 22 нефт боловсруулах үйлдвэр цохилтод өртсөн гэх мэдээлэл ирсэн. Тиймээс шатахуун хангамжийн 30-40 хувь нь доголдолд орчихоод байгаа. ОХУ-ын Засгийн газраас он дуустал АИ-92 шатахууныг хязгаарласан. Монгол Улсын хувьд Засгийн газар хоорондын хэлэлцээртэй, хямд нөхцөлөөр шатахуун авах гэрээтэй учраас гэрээний дагуу энэ сард 58 мянган тонн АИ-92 шатахууныг ОХУ-аас авна. Харин үлдсэнийг нь БНХАУ-аас авахаар гэрээ хэлэлцээр хийж байна. Иргэдийг шатахуун нөөцлөхгүйгээр банкныхаа хэмжээгээр аваач ээ гэж хэлмээр байна. Иргэд шатахуунаа нөөцөлж байгаа учраас хэрэглээ хоёр дахин нэмэгдээд байгаа юм. Улаанбаатар хотын хувьд шатахуун түгээх станцууд бага зэрэг хязгаарлалт хийж байгаа” гэж мэдээлсэн.