Олимп, дэлхийн аваргад амжилт гаргасан залууст байр, машины өгнө гэж батламж олгочихоод 10, 20 жил сураггүй болдог томчууд байна. Зарим нь бүр амлалтандаа хүрч чадаагүй байж бид түүнд байр, машин өгөх үүрэг хүлээгээгүй хэмээн бүдүүлэг загнах нь ч бий. Олны нүдэн дээр залуусаа дэмждэг, урамшуулж чаддаг юм шигээр баахан юм өгч нэр хүндээ давхар өсгөчихөөд сураггүй болдог сайд, дарга нар бишгүй бий. Үүнтэй холбоотой хамгийн сүүлийн үеийн жишээ гэвэл, Тивийн аварга жүдоч О.Отгонбаатар өөрийн цахим хуудастаа УИХ-ын гишүүн асан Ж.Мөнхбат, Дархан аварга Г.Өсөхбаярын нарын бусдад шагнал олгохоор зогсож буй зургийг тавьж “Машин өгнө гэчихээд найман жил боллоо. Хэзээ өгөх вэ” хэмээн Г.Өсөхбаяр аваргыг дурдсан байдаг. 

Ж.МӨНХБАТ Э.ЦЭНДБААТАРТ МАШИН АВЧ ӨГӨХ АЛБАГҮЙ, ҮҮРЭГ Ч БАЙХГҮЙ ХЭМЭЭЖ БАЙВ

     Үүгээр зогсохгүй МУГТ Э.Цэндбаатар гавьяатын найраа хийж үеэр нутгийнх нь гишүүд болох Ж.Мөнхбат "Jimmy машин бэлэглэж байна. Бэлгийн машин түгжрээнд ороод хоцорчихлоо, одоохон ирнэ” хэмээн хэлчихээд өгөөгүй гэх асуудал үүсч байсан. Тэр тухай Ж.Мөнхбат “"Өнгөрсөн хавар байхаа Э.Цэндбаатар найраа хийхдээ нутгийн зөвлөлийнхнийг ирээч гэж урьсан. Бид Э.Цэндбаатартай холбоогүй. Архангайнх гэсэн сураг л байсан. Тэгээд уулзсан. Бид нутгийн зөвлөлөөрөө ярилцаад амжилт гаргасан юм чинь унаа тэрэгний асуудалд шийдье гэж тохирсон. Тухайн үед цаг орой болсон байсан болохоор Jimmy гэдэг машины эрхийг "Бридж групп"-ээс авсан. Тухайн эрхийн бичиг нь түгжрэлд ороод бид амлаад гарсан. Үүний дараа Э.Цэндбаатар хоёр гурван удаа уулзсан. Мэдээж үүнийг төсвийн мөнгөнөөс шийдэхгүй. Бид шууд аваад өгчихөөр бэлэн мөнгөтэй хүмүүс биш. Ямартай ч эрхийн бичгийг нь гардуулсан. Тэгээд өөрт нь ч хэлсэн. "Нутгийн зөвлөл бол хандив цуглуулдаг юм. Үүнд цаг хугацаа орно. Асуудлыг чинь шийдэж өгнө" гэдгээ хэлсэн. Гэтэл тавдугаар сараас Э.Цэндбаатар хэвлэлээр янз бүрийн юм ярьж эхэлсэн. Миний нэрийг барьж, PR хийлээ гэх мэт. Түүний нэрийг бид яриад яахав дээ.

       Бид мөнгийг нь цуглуулж байгаа. Гэтэл Э.Цэндбаатар болон түүний хамаарал бүхий хүмүүс бид нар руу дайрч эхэлсэн. Тэгэхээр нь "Ер нь албатай ч биш. Үүрэг байхгүй". Бид "Бридж групп"-т урьдчилгаа 5-10 сая төгрөг өгсөн. Түүнээс залилаад, PR-аа хийгээд байгаа юм байхгүй. Мөнгө нь бүрдвэл Архангай аймагт хэрэгтэй байгаа түргэн тусламжийн машиныг нь аваад өгчихдөг юм билүү гэж ярилцсан" хэмээж байв. 

О.БААСАНХҮҮ:ОЛИМПООС МЕДАЛЬ АВААД БААХАН БАТЛАМЖТАЙ БОЛЛОО

      Мөн саяхан олимпын мөнгөн медальт Б.Баасанхүү өөрийн цахим хуудастаа “Хүний хөдөлмөрийг яасан сайхан үнэлдэг юм бэ. Хөвсгөлийн нутгийн зөвлөл минь надад нэг батламж л өгсөн дөө. Олимпоос медаль аваад баахан батламжтай боллоо.” хэмээн бичиж, олон хүнийг талцуулсан. Тэр тухайн нь нугийн зөвлөлийн гишүүнээс тодруулахад “Манай зөвлөл төрийн байгууллага биш. Улаанбаатар хотод амьдардаг Хөвсгөл аймгаас гаралтай иргэд сайн дураараа нэгдэн нийлж, аливаа төсөв санхүүг гаргаж, үйл ажиллагаандаа зарцуулдаг. Манай зөвлөлийнхөн Б.Баасанхүүг олимпоос медаль аваад ирэхэд нь баярлаж, хүн тус бүр мөнгө өгч байснаас бодит зүйл бэлэглэе хэмээн ярилцаж, 2026 онд ашиглалтад орох орон сууцны батламж олгож байсан. Одоогоор бид тухайн орон сууцны төлбөрийг төлөөд явж байгаа. Уг нь энэхүү асуудлыг Б.Баасанхүү мэдэж байгаа. Улсын мөнгөөр түүнд орон сууц авч өгнө гэж амлаагүй учир зарим нь мөнгөтэй мөнгөгүй үе таарч байгаа. Бид ч мөнгө өгнө гэж амласан хүмүүсээс тухайн бүрд нь нэхэж, шаардаж байгаа. Бэлгийн морины шүдийг бүү үз гэдэг үг байдаг. Одоогийн байдлаар мөнгө өгнө гэж амласан хүмүүс 50 хувьд хүрээгүй байгаа нь удааширлыг бий болгож байгаа. Уг нь бид сайн санааны үүднээс буюу нутгийн охин олимпоос медаль аваад ирлээ хэмээн баярлаж, дээрх үйл ажиллагааг зохион байгуулсан юм” гэв.