Баянхонгор аймаг руу Бүсийн суралгалтад оролцохоор явсан Онцгой байдлын алба хаагчид автобустайгаа осолдож, олон хүн бэртсэн гэх мэдээлэл гарсан. Энэ талаар ОБЕГ-ын хэвлэлийн албанаас тодруулахад “Онцгой байдлын байгууллагын нэгдсэн сургалт, дадлагад оролцохоор явж байсан алба хаагчдын автобус Өвөрхангай аймгийн Хайрхандулаан сумын нутаг дэвсгэрт өчигдөр замын хажуугийн шон мөргөсөн осол гарсан. Автобусанд 16 алба хаагч явсан бөгөөд ослын улмаас гурван алба хаагч хүндэвтэр, долоон алба хаагч хөнгөн гэмтэл авсан. Онцгой байдлын байгууллагын зүгээс алба хаагчдынхаа эрүүл мэндийг хамгаалах шаардлагатай арга хэмжээнүүдийг хэрэгжүүлж байна. Энэ хүрээнд Агаараас эрэн хайх, аврах ангийн яаралтай тусламжийн багийг илгээж, хүндэвтэр болон хөнгөн гэмтэл авсан алба хаагчдыг авчран Гэмтэл согог судлалын үндэсний төвд эмчлүүлж байна. Ослын шалтгаан нөхцөлийг тогтоохоор Өвөрхангай аймгийн Цагдаагийн байгууллага ажиллаж байна. Онцгой байдлын байгууллагаас жил бүр сургалт, бэлтгэлийн төлөвлөгөөг гаргаж, зохион байгуулсан сургалтыг дүгнэх, цаашдын төлөвлөлтийг хийх зорилгоор нэгдсэн сургалт, бэлтгэлийг зохион байгуулдаг уламжлалтай. Сургалт, бэлтгэл гэдэгт нь алба хаагчдын мэргэжлийн ур чадвар, сэтгэлзүй, бие бялдрыг хөгжүүлэх олон талт арга хэмжээг хэлдэг бөгөөд харилцан туршлага, дадлага солилцож, ирэх жилийн зорилтоо тодорхойлдог онцлогтой юм” гэлээ.

ГССҮТ:ЗАМ ТЭЭВРИЙН ОСОЛД ОРСОН АЛБА ХААГЧДЫН ГУРАВ НЬ МЭС ЗАСЛИЙН ТАСАГТ ЭМЧЛҮҮЛЖ БАЙГАА

    Харин ГССҮТ-ийн мэргэжилтнээс хүндэвтэр гэмтсэн гурван хүнд ямар эмчилгээ хийж байгаа талаар тодруулахад “Зам тээврийн осолд орсон Онцгой байдлын алба хаагчдын биеийн байдал тогтвортой байгаа. Одоогийн байдлаар манай эмнэлэгт гурван хүн хүргэгдэж ирсэн. Хоёр нь насанд хүрэгчдийн мэс заслийн тасагт, нэг нь толгойн мэс заслын тасагт хэвтэн эмчлүүлж байгаа. Тэд мэс засалд орохгүй” гэсэн юм.