Ерөнхий сайд Г.Занданшатарыг огцруулсан шийдвэр Үндсэн хууль зөрчсөн эсэхийг Үндсэн хуулийн цэцийн их суудлын хурлаар хэлэлцэж байна. Энэ үеэр УИХ-ын гишүүн Н.Номтойбаяр “Үндсэн хуулийн цэцийн их суудлын бүрэлдэхүүнд ашиг сонирхлын зөрчилтэй хүмүүс бий. Түүний нэг нь О.Мөнхсайхан гэх цэцийн гишүүн байгаа. Ашиг сонирхол нэгт этгээдийнхээ захиалгатай даалгаврыг гүйцэтгэхээр цэцийн бүрэлдэхүүнд байгааг бид эсэргүүцлээ. Г.Занданшатар Ерөнхий сайдын УИХ-ын дарга байхад хөлсөөр ажиллах гэрээ байгуулж ажиллаж байсан. Г.Занданшатар Ерөнхий сайдын гаргасан өргөдлийг хэлэлцэж суух нь зохимжгүй. Үндсэн хуулийн цэцэд маргаан хянан шийдвэрлэх ажиллагааны тухай хууль гэж байдаг. Энэ хуулийн 23.3-т дайны нөхцөлтэй, цэрэг бэлтгэх, онц байдал зарласан үед гурав хоногийн дотор аливаа асуудлаар цэц хуралдаж, шийдвэр гаргадаг. Энэ хуулийн заалтыг удирдлага болгож өнөөдөр хуралдаж байна. Монгол Улсад дайн дажин огт болоогүй. Хууль зөрчиж, Их суудал хуралдаж байгаа нь ноцтой асуудал болж байна. Энэ мэтчилэн маш олон хуулийн асуудал байгаа. Адаглаад УИХ гаргаагүй байгаа шийдвэрээр өнөөдөр Үндсэн хуулийн цэц хуралдаж байх жишээтэй. Үндсэн хуулийн цэцийн их суудлын хуралдаанд итгэмжлэгдсэн төлөөлөгчөөр П.Сайнзориг гишүүн томилогдсон. Гэтэл итгэмжлэгдсэн төлөөлөгчөөр томилогдсон энэ шийдвэрийг цэц хүлээн зөвшөөрөхгүйгээр гэрч хэмээн зарласан. Энэ нь УИХ-ын тухай хууль, УИХ-ын гишүүний бүрэн эрхэд шууд халдаж байгаа юм. Цэцийн гишүүн О.Мөнхсайханаас татгалзах албан хүсэлтийг бидний зүгээс гаргасан” гэв.