БОЛОВСРОЛЫН ЯАМНЫ ТНБД Х.БАТЖАРГАЛ ХӨГЖЛИЙН БАНКНЫ ХЭРЭГТЭНТЭЙ ХАМТ ХЯТАД РЕСТОРАН, БАС БААР АЖИЛЛУУЛДАГ

Б. Цогтбаяр:
Эрэн сурвалжлах

2025-10-23, 303

Боловсролын яам багш нартайгаа тохиролцож чадахгүй гэдийгээд, хөөрхий хүүхдүүд харах хүнгүй гэртээ түгжигдсээр найм хонож байна. Хэзээ цэцэрлэг, сургууль хэвийн ажиллаж эхлэх тухай мэдэж байгаа хүн саарал ордонд ч, салбарын яаманд нь ч алга. Үндсэндээ боловсролын салбар “0” зогсчихоод байна. Иймд бид багш нартайгаа хурдан хэл амаа ололцож чадахгүй байгаа Боловсролын яамыг чухам ямар хүмүүс удирдаж байгааг цувралаар танилцуулж буй. Төрийн түшээдийг нь хавьтуулахааргүй хөрөнгөтэй лавтай долоон тэрбумтан Боловсролын яаманд буй юм билээ. Харин энэ удаад Боловсролын яамны Төрийн нарийн бичгийн дарга Х.Батжаргалын баарны бизнесийг танилцуулж байна.

Боловсролын яамны Төрийн нарийн бичгийн дарга Х.Батжаргал 10 жилээсээ зүү орох зайгүй нөхөрлөсөн Б.Чойжилжалбуу, Ж.Мөнхбат гэх хоёр найзтай. Х.Батжаргал, Б.Чойжилжалбуу, Ж.Мөнхбат гурав “Си Эн Ай” ХХК, “Архангай аймгийн залуучууд оюутны төв” ХХК-ийг хамтран эзэмшдэг. Харин Х.Батжаргал, Ж.Мөнхбат хоёр “Ивенто” ХХК-ийг, Х.Батжаргал, Б.Чойжилжалбуу хоёр “Хамаг монгол хангай групп” ХХК-ийг хамтран эзэмшдэг. Тэдний дээрх бүх компаниудынх нь гүйцэтгэх захирлаар Б.Чойжилжалбуугийн баз хүргэн О.Хүрэлтогоо гэх залуу ажилладаг. Цаашилбал, 2016 оны УИХ-ын сонгуулиар Ж.Мөнхбат УИХ-ын гишүүн болж, улмаар ЗГХЭГ-ын даргаар томилогдсоны дараа Б.Чойжилжалбуу Хөгжлийн банкны дэд захирал бөгөөд Хөрөнгийн удирдлагын газрын даргаар, эхнэрийнх нь төрсөн дүү Б.Ганчимэг нь Хөгжлийн банкны Хөрөнгө оруулалтын сан байгуулах төслийн нэгжийн даргаар, харин Х.Батжаргал Байгаль орчны яамны Төрийн захиргааны удирдлагын газрын даргаар, эхнэр Б.Долгион нь Хөгжлийн банкны Санхүүжилтийн шинжээчээр тус тус томилогдож байв. Товчхондоо, Х.Батжаргал, Б.Чойжилжалбуу, Ж.Мөнхбат гурав бизнес нэгтэй, бие биенээ гэр бүлээр нь төрд татдаг, түшдэг тун дотно найзууд.

Гэвч Ж.Мөнхбат нь нүүрсний хулгайн хэрэгт холбогдож, АТГ-ынханд ачигдхаасаа өмнө амжаад УИХ-ын гишүүнээс чөлөөлөгдөх өргөдлөө өгч, "Ээжийгээ эмчлүүлнэ" гэх шалтгаан зохиогоод, хил давж зугтсан. Харин Б.Чойжилжалбуу нь Хөгжлийн банкны Хөрөнгийн удирдлагын газрын дарга байхдаа эрх мэдлээ урвуулан ашиглаж “НВЦ” ХХК тэргүүтэй компаниудад зээл олгосон хэргээр шүүгдэж, төрд ажиллах эрхийг найман жилээр хасуулж, хоёр жилийн хорих ял, зургаан сая төгрөгөөр торгох ял тус тус сонссон. Улмаар Улсын дээд шүүхэд ирээд “Гэм буруугаа хүлээн зөвшөөрч байна, гэхдээ хавдартай тул хоёр жилийн хорих ялыг минь торгох ялаар сольж өгнө үү” гэх хүсэлт гаргаж, хариуд нь "Хийсэн хэргийнхээ ялаас мултрах гэлээ" гэж нийгэмд шүүмжлүүлж байсныг нь санаж буй байх. Ийнхүү Х.Батжаргалын зүү орох зайгүй хоёр найзын нэг нь хил давж зугтсан, нөгөө нь ял сонссон. Харин Х.Батжаргал л Боловсролын яамны Төрийн нарийн бичгийн дарга болтлоо томорчихоод буй.

Тэгвэл Боловсролын яамны Төрийн нарийн бичгийн дарга Х.Батжаргал, өнөөх Хөгжлийн банкны хэрэгтэн Б.Чойжилжалбуу хоёр өдгөө хятад ресторан, бас баар ажиллуулж буй ажээ. Тодруулбал, Боловсролын яамны Төрийн нарийн бичгийн дарга Х.Батжаргалын эхнэр Б.Долгион, Хөгжлийн банкны хэрэгт Б.Чойжилжалбуугийн эхнэр Б.Гэрэлчимэг хоёр “Дол Жэ” ХХК-ийг хамтран эзэмшдэг. Тэдний “Дол Жэ” ХХК нь БГД-ийн 3-р хороо, Нарны хорооллын урд буюу ХҮН намын дарга Т.Доржхандын “Auto Hub” барилгатай хаяа залгаа “Agro center” барилгын 10-н давхарт “Lotus Tang” гэх хятад ресторан, 11-р давхарт нь “Leven” гэх баар ажиллуулдаг ажээ. Боловсролын яамны Төрийн нарийн бичгийн дарга нь авлига, албан тушаалын хэргээр ял сонссон Хөгжлийн банкны хэрэгтэнтэй хамтраад, тэгэхдээ бүр баар ажиллуулаад явж байгаа нь хэр зохимжтойг уншигч та тунгаах биз ээ.

Тайлбар: "Agro center"-ийн 10-н давхарт байрлах хятад ресторан

Тайлбар: "Agro center"-ийн 11-н давхар буюу дээвэрт нь байрлах баар

Сонирхуулахад, Х.Батжаргал, Б.Чойжилжалбуу хоёрын эхнэрүүдийн “Lotus Tang” ресторан, “Leven” баар байрладаг “Аgro Center” барилга нь Н.Мөнхбаяр, Г.Дөлгөөн, Б.Болдсүх гурвын хүний хамтран эзэмшдэг “Агро стейт” ХХК-ийн нэр дээр байдаг. Гэтэл Н.Мөнхбаяр, Г.Дөлгөөн, Б.Болдсүх гурав нь “НВЦ” ХХК-ийн охин компани болох “Конситус” ХХК-ийг 2023 оноос эзэмшдэг болцгоосон байх юм. Ноцтой нь, “НВЦ” ХХК-д албан тушаалаа урвуулан ашиглаж зээл олгоод, тэр нь баригдаж ял сонссон хүн нь Б.Чойжилжалбуу. Энэ нь Х.Батжаргал, Б.Чойжилжалбуу хоёр Хөгжлийн банкны хэргээс улбаатайгаар “Аgro Center” барилгатай буруу замаар холбогдсон байж болзошгүй сэжүүр тул АТГ шалгах нь зөв биз ээ.

ҮРГЭЛЖЛЭЛ БИЙ...

БОЛОВСРОЛЫН ЯАМНЫ ТНБД Х.БАТЖАРГАЛ ХӨГЖЛИЙН БАНКНЫ ХЭРЭГТЭНТЭЙ ХАМТ ХЯТАД РЕСТОРАН, БАС БААР АЖИЛЛУУЛДАГ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид