Монгол Улсын усан пологийн шигшээ баг Хорватын Дубровник хотноо зохион байгуулагдаж буй “World Aquatics Water Polo 4x4 Open Championships 2026” тэмцээнд эх орноо төлөөлөн оролцож байна. Энэ тэмцээн нь “Water Polo 4x4” төрлийн анхдугаар дэлхийн хэмжээний тэмцээн гэдгээрээ онцлогтой юм. Тус тэмцээн 2026 оны наймдугаар сарын 31-нээс есдүгээр сарын 6-ны өдрүүдэд Дубровник хотын түүхэн “Old Town Harbour”-т далайн усанд байгуулсан тусгай талбайд зохион байлагдаж байгаа юм.

    “World Aquatics”-ийн шинэ төрлийн тэмцээний дэлхийн анхны нээлтэд Монгол Улс оролцож байгаа нь манай усан пологийн спортын хувьд түүхэн үйл явдал болж байна. Монгол Улс болон Литва Улс энэхүү шинэ форматын дэлхийн тавцанд анх удаа оролцож буй орнуудын нэг болж байгаа. “Water Polo 4x4” нь уламжлалт усан пологоос илүү хурдтай, эрчимтэй тоглолтод суурилсан шинэ формат бөгөөд нэг баг найман тоглогчтой, тоглолтын үеэр усанд гурван талбайн тоглогч болон нэг хаалгач, нийт дөрвөн тоглогч тоглоно. Тоглолтын талбай 15 х 12 метр хэмжээтэй бөгөөд үе тус бүр таван минут үргэлжилнэ.

   Монгол, Сербийн багийн анхны тоглолтоо сүүлийн гурван олимпын наадмын аварга Сербийн шигшээ багийн эсрэг хийж, 3:0-ээр хожигдсон байна. Хэдийгээр Монголын баг дэлхийн шилдэг усан пологийн орнуудын нэг Сербийн эсрэг хүнд тоглолт хийсэн ч энэхүү тэмцээнд оролцож байгаа нь Монголын усан пологийн тамирчдад дэлхийн түвшний туршлага хуримтлуулах, шинэ форматын онцлогийг эзэмших, цаашдын хөгжлийн чухал алхам болж байна.