Бүгд Найрамдах Киргиз Улсад “Дэлхийн нүүдэлчдийн VI их наадам” өчигдөр албан ёсны нээлтийн ёслолоо хийлээ. Өчигдөр орой 2026 оны наймдугаар сарын 31-ний орой 20:00 цагт энэхүү наадмын нээлтийн ёслол болсон. Тус нээлтийн ёслолд Монгол Улсын Ерөнхийлөгч У.Хүрэлсүх, Соёл, спорт, аялал жуулчлал, залуучуудын сайд Ж.Алдаржавхлан нар оролцоно. Энэ удаагийн наадамд дэлхийн 113 орны албан ёсны төлөөлөгчид болон 3,500 төлөөлөгчид оролцон нүүдэлчин угсаатны болон уламжлалт спортын 43 төрөлд хурд хүч, авхаалж самбаагаа сорин өрсөлдөнө.

    Монгол Улсаас энэхүү наадамд спортын 27 төрөлд 135 тамирчин, дасгалжуулагч оролцож байгаа бөгөөд үндэсний спорт, нүүдэлчин соёл, өв уламжлалаа дэлхийн тавцанд сурталчлан таниулж, спортоор өрсөлдөх юм. Энэ удаагийн наадамд анх удаагаа Монголын үндэсний бөхийн барилдааныг албан ёсоор тэмцээний хөтөлбөрт багтааснаараа чухал онцлогтой болж байна. “Дэлхийн нүүдэлчдийн VI наадам” нь Бүгд Найрамдах Киргиз улсын нийслэл Бишкек хот болон Иссык-Куль нуурын эрэг дэх Чолпон-Ата хотод зохион байгуулагдана.

    Наадмын нээлтийн ёслол Киргиз Улсад шинээр ашиглалтад орсон 51 мянган хүний суудалтай цэнгэлдэх хүрээлэнд болох бөгөөд оролцогч улс орнуудын үндэсний соёл, уламжлал, өвөрмөц онцлогийг харуулсан ёслолын арга хэмжээ болно. Монголын баг тамирчид өвөг дээдсээс уламжлагдан ирсэн эр зориг, тэсвэр хатуужил, эв нэгдэл, ухаан билэг шингэсэн нүүдэлчин соёл, үндэсний спортын үнэт өвөө тээн, Монгол Улсынхаа нэрийг дэлхийн тавцанд өндөрт өргөхөөр өрсөлдөх гэж байна.