Монголын иогчдын холбооны тэргүүн Б. Туул болон Удирдах зөвлөлийн гишүүд өнөөдөр Энэтхэг Улсын Бангалор хотыг зорьж буй холбооны 25 гишүүнийг “Чингис хаан” олон улсын нисэх онгоцны буудлаас үдэн гаргалаа. Тус гишүүд 2026 оны наймдугаар сарын 31-нээс есдүгээр сарын 26-ны өдрүүдэд Энэтхэгийн нэр хүндтэй Свами Вивекананда Иога Анусандхана Самстхана (SVYASA) их сургуульд зохион байгуулагдах “Иогийн сургагч багш нарт зориулсан тусгай сургалтын хөтөлбөр – II”-т хамрагдана.

    Нэг сарын хугацаанд үргэлжлэх энэхүү тусгай сургалтыг Энэтхэг Улсын Засгийн газрын бүрэн санхүүжилтээр, Гадаад хэргийн яамны Энэтхэгийн техник, эдийн засгийн хамтын ажиллагааны “ITEC” тэтгэлэгт хөтөлбөрийн хүрээнд хэрэгжүүлж буй юм. Тэтгэлэгт сургалтын төлбөр, олон улсын нислэг, байр, хоол болон бусад холбогдох зардал бүрэн багтсан бөгөөд нийт санхүүжилт нь ойролцоогоор 200 мянган ам.доллартай тэнцэнэ.

   Энэ нь Монголын иогийн багш нар мэдлэг, ур чадвараа олон улсын түвшинд ахиулахын зэрэгцээ иогийн өлгий нутагт уламжлалт сургаал, философи, арга зүйг гүнзгийрүүлэн судлах онцгой боломж юм. Ийнхүү сүүлийн нэг жилийн хугацаанд Монголын иогчдын холбооны нийт 31 багш Энэтхэг Улсад мэргэжил дээшлүүлэх сургалтад хамрагдсан болно. Монгол, Энэтхэг хоёр улсын иог, боловсролын салбарын хамтын ажиллагааны нэгэн чухал үйл явдал болж байна.

   Монголын иогийн салбарын хөгжилд үнэтэй хувь нэмэр оруулж, багш нарт маань энэхүү нэр хүндтэй сургалтад хамрагдах боломж бүрдүүлэн, бүхий л талаар дэмжлэг үзүүлсэн Энэтхэг Улсын Засгийн газар, Гадаад хэргийн яам, Аюуш яам болон холбогдох байгууллагуудын хичээл зүтгэл их байлаа.  Түүнчлэн энэхүү ажлыг бодитоор хэрэгжүүлэхэд үнэтэй хувь нэмэр оруулж, тууштай дэмжин ажилласан Энэтхэг Улсаас Монгол Улсад суугаа Онц бөгөөд Бүрэн эрхт Элчин сайд, Эрхэмсэг ноён Атул Малхари Готсурве болон Элчин сайдын яамны хамт олны чин сэтгэлийн тус дэм их байв

    Эрхэм багш нар эрдэм мэдлэг, шинэ туршлагаар дүүрэн, үр өгөөжтэй суралцаж, сургалтаа өндөр амжилттай дүүргэх нь дамжиггүй. Эх орон, Монголын иогчдын холбоогоо нэр төртэй төлөөлж, сурч мэдсэн бүхнээ Монголын иогийн хөгжил, боловсрол, практикт түгээн дэлгэрүүлэх үнэтэй хувь нэмэр оруулна гэдэгт итгэлтэй байна.