Монголын жүдо бөхийн холбоо багш, дасгалжуулагчдаа жүдогийн эх орон Япон Улсад сургаж, “Кодокан”-ы сургалтад хамруулан, албан ёсны дангийн шалгалт өгүүллээ. Шалгалтад амжилттай тэнцэж, “Кодокан”-ы албан ёсны дангийн зэрэг хүртсэн багш, дасгалжуулагчдад Япон Улсаас ирүүлсэн дангийн үнэмлэх, сертификатыг гардуулан өглөө. Монголын жүдогийн сургалтын арга зүй нь үе үеийн багш, дасгалжуулагчдын хуримтлуулсан мэдлэг, туршлага их бий.

    Тэд Зөвлөлтийн спортын шинжлэх ухаанч бэлтгэлийн систем болон самбо бөхийн арга барилд тулгуурлан хөгжиж, өнөөгийн амжилтын бат бөх суурийг бүрдүүлсэн билээ. Монголын жүдо бөхийн холбоо энэхүү үнэт өв, туршлагыг улам боловсронгуй болгох зорилгоор “Кодокан” жүдогийн сургалтын арга зүй, философийг Монголын жүдогийн сургалтын тогтолцоотой уялдуулан хөгжүүлэх шинэ үеийг эхлүүлж байна. Энэ нь өмнөх сургалтын тогтолцоог үгүйсгэсэн өөрчлөлт бус, харин үе үеийн багш, дасгалжуулагчдын бий болгосон ололт амжилтыг “Кодокан”-ы үндсэн зарчим, олон улсын сургалтын жишгээр баяжуулан, дараагийн шатанд гаргах хөгжлийн чухал алхам юм.