Холимог тулааны 2026 оны өсвөр үеийн дэлхийн аварга шалгаруулах тэмцээн Арабын Нэгдсэн Эмират Улсын нийслэл Абу-Даби хотод болох гэж байна. Дэлхийн 60 гаруй орны 1200 орчим өсвөрийн тамирчид хуран чуулж байгаа. Тус ДАШТ-д оролцох Монгол Улсын баг тамирчдын эхний хэсэг эх орноосоо мордлоо. Дөрвөн насны ангиллаар зохион байгуулагддаг холимог тулааны өсвөр үеийн дэлхийн хамгийн том тэмцээн наймдугаар сарын 16-23-ны өдрүүдэд Абу-Дабигийн “Мубадала арена” ордонд явагдана.  

     Монгол эх орноо төлөөлөн тус тэмцээнд нийт 19 тамирчин өрсөлдөнө. Мөн Монголын холимог тулааны холбооны Шүүгчдийн зөвлөлийн нарийн бичиг, Олон улсын шүүгч Ж.Лхагвабат тэмцээний шүүгчдийн багийн бүрэлдэхүүнд багтан ажиллахаар уригдаад байгаа юм. Олон улсын тэмцээнд оролцох эрх нь сэргэсэн Оросын Холбооны Улсын баг тамирчид өргөн бүрэлдэхүүнтэй өрсөлдөж буйгаараа энэ жилийн дэлхийн аварга онцлог болж байна.