Монголын таеквондо-гийн холбооны урилгаар Бүгд Найрамдах Солонгос Улсын Үндэсний спортын их сургуулийн захирал Мүн Вон Жэ тэргүүтэй профессор, багш нарын төлөөлөгчид Монгол Улсад албан айлчлал хийж байна. Тус айлчлал нь Монгол Улс, БНСУ-ын спортын боловсрол, эрдэм шинжилгээ, судалгаа өргөжүүлнэ. Олимпын таеквондо-гийн хөгжлийн чиглэлээр хамтын ажиллагааг өргөжүүлж, хоёр байгууллагын урт хугацааны түншлэлийг шинэ шатанд гаргах зорилготой юм.

     Айлчлалын хүрээнд төлөөлөгчдийг Биеийн тамир, спортын улсын хорооны даргын үүргийг түр орлон гүйцэтгэгч Э.Билэгт хүлээн авч уулзав. Хоёр улсын таеквондо-гийн спортын хөгжлийн өнөөгийн чиг хандлага, Үндэсний шигшээ багийн хамтарсан бэлтгэлийн тогтолцоо, дасгалжуулагч, спортын мэргэжилтэн бэлтгэх чиглэлээр хамтын ажиллагааг өргөжүүлэх боломжийн талаар санал солилцов. Мөн төлөөлөгчид Үндэсний шигшээ багийн бэлтгэлийн төвийн үйл ажиллагаатай танилцаж, Монголын шигшээ багийн тамирчдын бэлтгэл сургуулилалтын явц, бэлтгэлийн орчин, спортын дэд бүтэцтэй газар дээр нь танилцлаа.

    Үүний дараа Солонгосын Үндэсний спортын их сургуулийн төлөөлөгчдийг Монголын таеквондо-гийн холбооны ерөнхийлөгч МУГД Б.Онон хүлээн авч уулзлаа. Хоёр байгууллагын хамтын ажиллагааны цаашдын чиглэл, хамтарсан сургалт, эрдэм шинжилгээ, судалгааны хөтөлбөр хэрэгжүүлэх юм байна. Мөн багш, дасгалжуулагч, оюутан, тамирчдын солилцоог өргөжүүлэх, өндөр түвшний хамтарсан бэлтгэлийг тогтмолжуулах асуудлаар ажил хэрэгч яриа хэлэлцээ хийлээ.

   Уулзалтын үеэр талууд таеквондо-гийн спортыг шинжлэх ухаанд суурилан хөгжүүлэх, хүний нөөцийн чадавхыг бэхжүүлэх, дасгалжуулагч, мэргэжилтний ур чадварыг дээшлүүлэх, олон улсын хамтын ажиллагааг өргөжүүлэх нь хоёр байгууллагын нийтлэг зорилго болохыг онцолж, хамтын ажиллагаагаа урт хугацаанд тогтвортой хөгжүүлэх эрмэлзлээ илэрхийлэв.

    Энэхүү айлчлал нь Монгол Улс, БНСУ-ын спортын салбарын хамтын ажиллагааг шинэ түвшинд гаргах үр нөлөөтэй юм. Монголын таеквондо-гийн спортыг шинжлэх ухаан, боловсрол, өндөр түвшний бэлтгэл сургуулилалтад тулгуурлан хөгжүүлнэ. Ирээдүйн олимпын наадам болон олон улсын томоохон тэмцээнүүдэд амжилттай өрсөлдөх тамирчин, дасгалжуулагч, мэргэжилтнүүдийг бэлтгэхэд чухал ач холбогдолтой үйл явдал болж байна.