Монгол Улсын Ерөнхийлөгчийн ивээл дор зохион байгуулж буй олимпын таеквондо-гийн Ази тивийн аварга шалгаруулах тэмцээний нээлтийн үйл ажиллагаа "М Банк Арена"-д өчигдөр боллоо. Олимпын наадмын чансааны оноо болон "Айчи-Нагоя 2026" Азийн XX наадмын эрх олгох энэхүү тэмцээнд 43 улсын 1300 гаруй тамирчин пүмсэ, пара таеквондо, тулааны төрлөөр найман хоногийн турш өрсөлдөнө.

    Нээлтийн үйл ажиллагаанд Монгол Улсын Ерөнхийлөгч Ухнаагийн Хүрэлсүх, ССАЖЗЯ-ны сайд Ж.Алдаржавхлан, Монголын таеквондо-гийн холбооны ерөнхийлөгч Б.Онон, Олон улсын олимпын хорооны гишүүн, МҮОХ-ны ерөнхийлөгч Б.Баттүшиг болон Дэлхийн таеквондо, Азийн таеквондо-гийн холбооны удирдлагууд оролцлоо.

   Энэ үеэр Монголын таеквондо-гийн спортын 35 жилийн түүхэнд Ази тивийн аварга шалгаруулах тэмцээнийг анх удаа эх орондоо зохион байгуулахад дэмжлэг үзүүлж, таеквондо-гийн спортын хөгжилд үнэтэй хувь нэмэр оруулсан Монгол Улсын Ерөнхийлөгч Ухнаагийн Хүрэлсүхэд Дэлхийн таеквондо-гийн төв "Күккивон"-ын ерөнхийлөгч Юн Үн Сок хүндэт дангийн батламж гардуулав. Ази тивийн аварга шалгаруулах тэмцээний нээлтийн үеэр Дэлхийн таеквондо-гийн холбооны үзүүлэх тоглолтын баг гайхалтай үзүүлбэр толилуулснаар энэ удаагийн нээлтийн үйл ажиллагаа албан ёсоор өндөрлөсөн юм.