МҮОХ-ны удирдлагууд Азийн таеквондо-гийн холбооны ерөнхийлөгч Sang Jin KIM болон “Taekwondo Promotion Foundation”-ийн захирал Kim Jung-Heon нарыг “Олимпик хаус”-т хүлээн авч уулзлаа. Уулзалтын үеэр МҮОХ-ны ерөнхийлөгч Б.Баттүшиг Монгол Улсад олимпын оноо олгох өндөр чансаатай Ази тивийн аварга шалгаруулах тэмцээнийг зохион байгуулах эрх олгосонд талархал илэрхийлж, цаашдын хамтын ажиллагааг өргөжүүлэн хөгжүүлэхэд бэлэн байгаагаа онцоллоо.

    Мөн Монгол Улсад таеквондо-гийн бэлтгэлийн бааз байгуулах, виртуал таеквондог хөгжүүлэх чиглэлээр хамтран ажиллах боломжийн талаар санал солилцов. Энэ хүрээнд Азийн таеквондо-гийн холбооны ерөнхийлөгч Sang Jin KIM бүх талаар дэмжин ажиллахаа илэрхийлсэн юм.

    Дашрамд дурдахад, 2026 оны тавдугаар сарын 19-26-ны өдрүүдэд Монгол Улсын Ерөнхийлөгчийн ивээл дор олимпын оноо олгох таеквондогийн өндөр чансаатай Ази тивийн аварга шалгаруулах тэмцээн анх удаа Улаанбаатар хотод зохион байгуулагдаж байна. Тус тэмцээн нь тулаан, тоот дасгал болон пара таеквондо-гийн төрлүүдээр явагдах бөгөөд Азийн 43 орны 1318 тамирчин, дасгалжуулагч, албаны төлөөлөгч оролцож байна.