Монгол Улсын Ерөнхийлөгчийн ивээл дор олимпын таеквондо-гийн насанд хүрэгчдийн Ази тивийн аварга шалгаруулах тэмцээн өнөөдөр “М Банк Арена”-д эхэлнэ.  Тэмцээнд Азийн 43 орны 1300 гаруй шилдэг тамирчин пүмсэ, тулаан, пара таеквондо гэсэн гурван төрлөөр тавдугаар сарын 26 хүртэл хүч сорих юм. Өчигдөр Азийн таеквондо-гийн холбооны чуулган болж 43 улсын төлөөлөл уг хуралд оролцлоо.

    Тэд оны тэмцээн уралдаан, бүтэц бүрэлдэхүүн болоод Монгол Улсын нийслэл Улаанбаатар хотноо болох шар тивийн аварга шалгаруулах тэмцээний зохион байгуулалтын талаар хэлэлцэв. Хуралд Монголын таеквондо-гийн холбооны ерөнхийлөгч Б.Онон , ерөнхий нарийн бичгийн дарга, Монгол Улсын гавьяат дасгалжуулагч Н.Эрдэнэбаатар нар оролцлоо.

   Пүмсэгийн ес, тулааны 27, пара таеквондо-гийн 11 дэх удаагийн тивийн аварга шалгаруулах тэмцээн тивийн хамгийн өндөр чансааны оноо олгож, ирэх есдүгээр сард Япон Улсад болох Азийн 20 дахь удаагийн наадмын эрх олгох юм.