Монголын үндэсний олимпын хорооны Гүйцэтгэх зөвлөлийн хурал өчигдөр "Олимпик хаус"-т боллоо. Хурлаар МҮОХ-ны дүрмийн дагуу Олимпын чуулганаас хойш хоёр сарын дотор товлодог Гишүүдийн хурлын бэлтгэл ажлыг хэлэлцэв.

  Мөн "Саньяа 2026" Азийн элсний VI наадамд оролцсон баг тамирчдын дүн, МҮОХ-ны үйл ажиллагааны төлөвлөгөө, төсөв болон гишүүнчлэлийн асуудлыг тус тус хэлэлцлээ. Үүнээс гадна "Лос-Анжелес 2028" олимпын наадмын хөтөлбөрт багтсан спорт холбоодын танилцуулга явагдсан юм.

   Гүйцэтгэх зөвлөлийн гишүүд МҮОХ-ны гишүүн байгууллагуудын хариуцлага, идэвх оролцоог нэмэгдүүлэх, жендэрийн тэгш байдлыг хангах болон олимпын үнэт зүйлсийг түгээн дэлгэрүүлэх бодлогыг үе шаттай хэрэгжүүлэхээр санал нэгдлээ.