Олон улсын жүдо бөхийн холбоо, “IJF”-ийн ээлжит цуврал “Гранд слам” тэмцээнд Тажикстаны нийслэл Душанбэ хотод 2026 оны тавдугаар сарын 1-3-ны өдрүүдэд болно. Тус “Душанбэ-2026” их дуулга тэмцээнд 34 орны эрэгтэй 142, эмэгтэй 98, нийт 240 тамирчин өрсөлдөнө. Манай улсаас энэ удаагийн их дуулга тэмцээнд эрэгтэйчүүдийн 60 кг-д Б.Сүхбат, 73 кг-д Л.Анхзаяа, О.Уранбаяр, 81 кг-д Б.Шинэтулга, -100 кг-д Б.Хүдэрчулуун, +100 кг-д Ө.Пэрэнлэйжамц нар барилдлаа. Харин эрэгтэйчүүдийн 66, 90 кг-ын жинд манай улсаас бөх барилдаагүй. Эмэгтэйчүүдийн 48 кг-д Ж.Анударь, 52 кг-д М.Нандин-Эрдэнэ, Ц.Гал-Од, 57 кг-д Т.Ариунзаяа, М.Цэндбазар, 63 кг-д Б.Ганхайч, Л.Энхрийлэн,70 кг-д У.Анужин -78 кг-д О.Хүслэн, +78 кг-д А.Адъяасүрэн, Д.Номинзул нар өрсөлдсөн.

ЭМЭГТЭЙЧҮҮДИЙН 48 КГ-ЫН ЖИНД Ж. АНУДАРЬ АЛТ МЕДАЛЬ

   Эмэгтэйчүүдийн 48 кг-ын жинд 16 тамирчин барилдсан. Манай улсаас өсвөрийн дэлхийн аваргын мөнгөн медальт, Ази тивийн аварга, “Душанбэ-2025 Гранд слам”-ын аварга, ОУХМ Жамсрангийн Анударь өрсөлдөв. Тэрбээр “D” хэсгийг толгойлон нэгдүгээр тойрогт Польшийн Wiktoria  SLAZOK-той ялсан. Хэсгийн аваргын төлөөх барилдаан Узбекистаны Ulbusin KHAKIMOVA ялж, шигшээ дөрөвт шалгарч үлдсэн.

   Дөрөвний нэгийн шигшээ барилдаанд Францын хашир туршлагатай тамирчин  Melanie LEGOUX CLEMENT-ыг ялсан. Алтан медалийн төлөөх барилдаанд Нидерландын амаргүй өрсөлдөгч 28 настай. Хүчтэй өрсөлдөгч Amber  GERSJES-ийг юко үнэлгээгээр хожиж, 2025, 2026 онд дараалан “Душанбэ-2026” их дуулгад түрүүллээ.

ЭМЭГТЭЙЧҮҮДИЙН 52 КГ-ЫН ЖИНД М.НАНДИН-ЭРДЭНЭ ХҮРЭЛ МЕДАЛЬ, Ц.ГАЛ-ОД V БАЙР

    Эмэгтэйчүүдийн 52 кг-ын жинд 17 тамирчин өрсөлдсөн. Манай улсаас өсвөрийн ДАШТ-ий хүрэл медальт, Ази тивийн аварга, ОУХМ М.Нандин-Эрдэнэ, ОУХМ Ц.Гал-Од нар барилдлаа.  Ази тивийн аварга, ОУХМ Мягмарсүрэнгийн Нандин-Эрдэнэ “С” хэсгийг толгойлон нэгдүгээр тойрог гоц мөргөн ялалт авсан байгаа. Хоёрдугаар тойрогт Өмнөд Солонгосын KIM Jiyeon-ыг буулган авсан. Хэсгийн аваргын төлөөх барилдаанд Италийн Kenya PERNA-д хожигдсон. Дагах тойргийн барилдаанд Хятадын Yuanli  ZHANG-ийг хожсон. Хүрэл медалийн төлөөх барилдаанд Узбекистаны Mukhayyo AKHMATOVA-г ялж, “Душанбэ-2026” их дуулгын хүрэл медалийн эзэн боллоо.

   Харин ОУХМ Цэрэнтогтохын Гал-Од “В” хэсгийн нэгдүгээр тойрогт гоц мөргөн ялалт авсан . Хоёрдугаар тойрогт Тажикстаны Madina QURBONZODA-г хожсон. Хэсгийн аваргын төлөөх барилдаанд Узбекистаны Mukhayyo AKHMATOVA-д ялагдлаа. Дагах тойргийн барилдаанд Узбекистаны Sugdiyona  RAFKATOVA-г буулган авсан. Хүрэл медалийн төлөөх барилдаанд  Италийн Kenya PERNA-д хожигдож, шагналт тавдугаар байрт орлоо. Ц.Гал-Одын хувьд Италийн тамирчнаас дутаад байх зүйл алга байлаа. Түүний шилжилт хөдөлгөөн зууранг, удаан харагдсан. Жаахан, дайчин, эрэмгий барилдсан бол медаль ойрхон байлаа.

 ЭМЭГТЭЙЧҮҮДИЙН 57 КГ-ЫН ЖИНД Т.АРИУНЗАЯА МӨНГӨН МЕДАЛЬ, М.ЦЭНДБАЗАР VII БАЙР

    Эмэгтэйчүүдийн 57 кг-ын жинд 14 тамирчин барилдсан. Манай улсаас өсвөрийн дэлхийн аварга, “Токио-2024” их дуулгын хүрэл медальт, Ази тивийн аваргын хошой мөнгөн медальт, ОУХМ Тэрбишийн Ариунзаяа, өсвөрийн дэлхийн аварга, ОУХМ Машбатын Цэндбазар нар өрсөлдөв.

    ОУХМ Т.Ариунзаяа 57 кг-ын жингийн бүх жүдочдыг толгойлон “А” хэсгийн нэгдүгээр тойрогт гоц мөргөн ялалт авсан. Хэсгийн аваргын төлөөх барилдаанд Киргизстаны Zhanar ZHOLDOSHEVA-г хожсон. Дөрөвний нэгийн хагас шигшээ барилдаанд ОХУ-ын Natalia  ELKINA-г ялж, финалд шалгарч үлдсэн. Алтан медалийн төлөөх барилдаанд ОХУ-ын залуу тамирчин Olga MUKHINA-д хожигдож, мөнгөн медаль хүртлээ. Т.Ариунзаяа хэт яарч мэхээ дутуу хийгээд байлаа.  Оросын Мухина их бяртай тамирчин байв. Хүчтэй хүнтэй барилдах аргаа олохгүй,  сэтгэлзүйн хувьд жаахан шатсан барилдаан гаргачихлаа.  

   Харин ОУХМ М.Цэндбазар “С” хэсгийн нэгдүгээр тойрогт Польшийн Karolina SIENNICKA-тай барилдаж ялсан. Хэсгийн аваргын төлөөх барилдаанд Хятадын TAO Yuying-д хожигдсон. Дагах тойргийн барилдаанд Францын Chloe DEVICTOR-т хожигдож, шагналт долдугаар байраар тэмцээнээ өндөрлүүлсэн.

ЭМЭГТЭЙЧҮҮДИЙН 63 КГ-ЫН ЖИНД Б.ГАНХАЙЧ АЛТ, Л.ЭНХРИЙЛЭН МӨНГӨ

    Эмэгтэйчүүдийн 63 кг-ын жинд 12 тамирчин барилдсан. Манай улсаас ДАШТ-ий хошой хүрэл медальт, Ази тивийн аварга, МУГТ Лхагватогоогийн Энхрийлэн, ДАШТ-ий хүрэл медальт, Ази тивийн аварга, ОУХМ Болдын Ганхайч нар өрсөлдсөн юм.  МУГТ Л.Энхрийлэн 63 кг-ын бүх тамирчдыг тэргүүлэн “А” хэсгийн нэгдүгээр тойрог гоц мөргөн ялалт авсан. Хэсгийн аваргын төлөөх барилдаанд ОХУ-ын Stefaniya VLASOVA-г хожиж, хагас шигшээ барилдаанд шалгарч үлдсэн. Дөрөвний нэгийн барилдаанд Австрийн Lubjana PIOVESANA-г буулган авч, финалд алтан медалийн төлөө ОУХМ Б.Ганхайчтай барилдахаар шалгарч үлдсэн.

Харин ОУХМ Б.Ганхайч “С” хэсгийн нэгдүгээр тойрогт гоц мөргөн ялалт авсан. Хэсгийн аваргын төлөөх барилдаанд Хятадын ZHANG Wen-ийг ялж, дөрөвний нэгийн финалд шалгарсан. Хагас шигшээ барилдаанд Өмнөд Солонгосын KIM Yeji-ийг ялж, финалд алтан медалийн төлөө барилдахаар шалгарч үлдсэн юм. Их дуулгын алтан төлөө, МУГТ Л.Энхрийлэнтэй барилдлаа. Үндсэн цагт хэн, хэнээсээ үнэлгээ авч чадаагүй. Нэмэлт цагт торгуулиар ОУХМ Б.Ганхайч ялалтыг авч, “Душанбэ-2026” их дуулгын хошой аварга болсон.

ЭМЭГТЭЙЧҮҮДИЙН 70 КГ-ЫН ЖИНД У.АНУЖИН

   Эмэгтэйчүүдийн 70 кг-ын жинд “Женко” клубийн залуу тамирчин, Уран-Өлзийн Анужин барилдсан. Энэ жинд 16 тамирчин байлаа. У.Анужин “D” хэсгийн нэгдүгээр тойрогт Германы Tayla GRAUER-тай барилдав. Үндсэн цагт хэн , хэнээсээ үнэлгээ авч чадаагүй. Торгуулиар У.Анужин ялагдал хүлээсэн.

 ЭМЭГТЭЙЧҮҮДИЙН -78 КГ-ЫН ЖИНД О.ХҮСЛЭН

    Эмэгтэйчүүдийн -78 кг-ын жинд 11 тамирчин өрсөлдсөн. Манай улсаас тус жинд ОУХМ Отгонбаярын Хүслэн барилдлаа. Тэрбээр “А” хэсгийн нэгдүгээр тойрогт Нидерландын Marit KAMPS-д ялагдсан.

 ЭМЭГТЭЙЧҮҮДИЙН +78 КГ-ЫН ЖИНД А.АДЪЯАСҮРЭН, Д.НОМИНЗУЛ

Эмэгтэйчүүдийн +78 кг-ын жинд 12 тамирчин байлаа. Манай улсаас ОУХМ Амарсайханы Адъяасүрэн, ОУХМ ДамбадаржаагийнНоминзул нар барилдсан. Тэд нэг хэсэгт сугалаа татсан юм. Д.Номинзул “В” хэсгийн нэгдүгээр тойрогт гоц мөргөн ялалт авсан. Хэсгийн аваргын төлөөх барилдаанд  Узбекистаны Mokhlaroyim TUKHTAMISHEVA хожигдсон. Харин ОУХМ А.Адъяасүрэн “В” хэсгийн нэгдүгээр тойрогт  Узбекистаны Mokhlaroyim TUKHTAMISHEVA-тай ялагдссан.

ЭРЭГТЭЙЧҮҮДИЙН 60 КГ-ЫН ЖИНД Б.СҮХБАТ

  “Душанбэ-2026” их дуулгын эрэгтэйчүүдийн 60 кг-ын жинд 18 тамирчин барилдах мэдүүлэг өгсөн байлаа. Манай улсаас Монгол Улсын дөрвөн удаагийн аварга, ОУХМ Бямбасүрэнгийн Сүхбат барилдав. Тэрбээр “В” хэсгийг толгойлон нэгдүгээр тойргийн барилдаанд гоц мөргөн ялалт авсан юм. Хоёрдугаар тойрогт Тажикстаны 18 настай залуу тамирчин  Loiq KUDBUDINOV-д ялагдаж, тэмцээнээ өндөрлүүлсэн.

ЭРЭГТЭЙЧҮҮДИЙН 73 КГ-ЫН ЖИНД Л.АНХЗАЯА V БАЙР

    Эрэгтэйчүүдийн 73 кг-ын жинд 20 тамирчин барилдана. Манай улсаас ДАШТ-ий хүрэл медальт, ОУХМ Лавжаргалын Анхзаяа, ОУХМ Одгэрэлийн Уранбаяр нар хүч сорин өрсөлдсөн. ОУХМ Лавжаргалын Анхзаяа “С” хэсгийг толгойлон нэгдүгээр тойрогт гоц мөргөн ялалт байгуулсан. Хоёрдугаар тойргийн барилдаанд Узбекистаны Khojiakbar TOSHEV-ыг ялсан. Хэсгийн аваргын төлөөх барилдаанд Хятадын Gaohui LIN-ийг буулган авч, дөрөвний нэгийн шигшээд шалгарч үлдсэн юм. Хагас шигшээ барилдаанд ОХУ-ын Karen GALSTIAN-д хожигдсон. Хүрэл медалийн төлөөх барилдаанд ОХУ-ын Danil LAVRENTEV-д ялагдаж, шагналт тавдугаар байраар тэмцээнээ өндөрлүүлэв.

   Харин ОУХМ Одгэрэлийн Уранбаяр “D” хэсгийг толгойлон нэгдүгээр тойрогт гоц мөргөн ялалт авсан байгаа. Хоёрдугаар тойрогт ОХУ-ын тамирчин  Karen GALSTIAN-д ялагдаж өрсөлдөөнөөс хасагдсан.

ЭРЭГТЭЙЧҮҮДИЙН 81 КГ-ЫН ЖИНД Б.ШИНЭТУЛГА

     Эрэгтэйчүүдийн 81 кг-ын жинд 24 тамирчин барилдсан. Манай улсаас залуу тамирчин Бадрахын Шинэтулга “D” хэсгийн нэгдүгээр тойрогт Тажикстаны Bakhtiyor BOZOROV-д ялагдсан.

ЭРЭГТЭЙЧҮҮДИЙН -100 КГ-ЫН ЖИНД Б.ХҮДЭРЧУЛУУН

     Эрэгтэйчүүдийн -100 кг-ын жинд 25 тамирчин барилдлаа. Манай залуу тамирчин Баярцэнгэлийн Хүдэрчулуун  “D” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт Хятадын Fuchun HUANG-д ялагдсан.

ЭРЭГТЭЙЧҮҮДИЙН +100 КГ-ЫН ЖИНД Ө.ПЭРЭНЛЭЙЖАМЦ

    Эрэгтэйчүүдийн +100 кг-ын жинд 17 тамирчин барилдсан. Манай залуу тамирчин Өсөхбаярын Пэрэнлэйжамц  “D” хэсгийн нэгдүгээр тойрогт Тажикстаны Muhamadrasul DAVLATOV-ыг ялсансан. Хоёрдугаар тойрогт ОХУ-ын Bislan KATAMARDOV-д хожигдож тэмцээнээ дуусгасан. Ийнхүү манай улсын жүдочид энэ удаагийн "Душанбэ-2026" их дуулга тэмцээнийг хоёр алт, хоёр мөнгө, нэг хүрэл, нийт таван медальтайгаар өндөрлүүлэв.