Олон улсын жүдо бөхийн холбоо, “IJF”-ийн ээлжит цуврал “Гранд слам” тэмцээнд Тажикстаны нийслэл Душанбэ хотод 2026 оны тавдугаар сарын 1-3-ны өдрүүдэд болно. Тус “Душанбэ-2026” их дуулга тэмцээнд 34 орны эрэгтэй 142, эмэгтэй 98, нийт 240 тамирчин өрсөлдөнө. Манай улсаас энэ удаагийн их дуулга тэмцээнд эрэгтэй зургаа, эмэгтэй 11 тамирчин өрсөлдөхөөр мэдүүлгээ өгөөд байна.

ЭМЭГТЭЙЧҮҮДИЙН 48 КГ-ЫН ЖИНД Ж. АНУДАРЬ

   Эмэгтэйчүүдийн 48 кг-ын жинд 16 тамирчин барилдана. Манай улсаас өсвөрийн дэлхийн аваргын мөнгөн медальт, Ази тивийн аварга, “Душанбэ-2025 Гранд слам”-ын аварга, ОУХМ Ж.Анударь өрсөлдөнө. Тэрбээр “D” хэсгийг толгойлон нэгдүгээр тойрогт Польшийн Wiktoria  SLAZOK-той барилдана. Хэрэв түүнийг ялах юм бол хоёрдугаар тойрог хэсгийн аваргын төлөө Узбекистан, Тажикстаны бөхчүүдийн хэн ялсантай өрсөлдөнө.

ЭМЭГТЭЙЧҮҮДИЙН 52 КГ-ЫН ЖИНД М.НАНДИН-ЭРДЭНЭ, Ц.ГАЛ-ОД

    Эмэгтэйчүүдийн 52 кг-ын жинд 17 тамирчин өрсөлдөнө. Манай улсаас өсвөрийн ДАШТ-ий хүрэл медальт, Ази тивийн аварга, ОУХМ М.Нандин-Эрдэнэ, ОУХМ Ц.Гал-Од нар барилдана. М.Нандин-Эрдэнэ “С” хэсгийг толгойлон нэгдүгээр тойрог гоц мөргөн ялалт авсан байгаа. Хоёрдугаар тойрогт Франц, Өмнөд Солонгосын тамирчдын хэн ялсантай барилдах юм. Харин Ц.Гал-Од “В” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Тажикстаны Madina QURBONZODA-тай таарсан.

ЭМЭГТЭЙЧҮҮДИЙН 57 КГ-ЫН ЖИНД Т.АРИУНЗАЯА, М.ЦЭНДБАЗАР

Эмэгтэйчүүдийн 57 кг-ын жинд 14 тамирчин барилдана. Манай улсаас өсвөрийн дэлхийн аварга, “Токио-2024” их дуулгын хүрэл медальт, Ази тивийн аваргын хошой мөнгөн медальт, ОУХМ Т.Ариунзаяа, өсвөрийн дэлхийн аварга, ОУХМ М.Цэндбазар нар барилдах юм. ОУХМ Т.Ариунзаяа 57 кг-ын жингийн бүх жүдочдыг толгойлон “А” хэсгийн нэгдүгээр тойрогт гоц мөргөн ялалт авсан байгаа. Хэсгийн аваргын төлөөх барилдаанд Киргизстан, Тажикстаны бөхчүүдийн хэн ялсантай таарна. Харин ОУХМ М.Цэндбазар “С” хэсгийн нэгдүгээр тойрогт Польшийн Karolina SIENNICKA-тай барилдана. Хэрэв түүнийг ялах юм бол хэсгийн аваргын төлөө Хятадын TAO Yuying-тай өрсөлдөнө.

ЭМЭГТЭЙЧҮҮДИЙН 63 КГ-ЫН ЖИНД Б.ГАНХАЙЧ, Л.ЭНХРИЙЛЭН

    Эмэгтэйчүүдийн 63 кг-ын жинд 12 тамирчин барилдана. Манай улсаас ДАШТ-ий хошой хүрэл медальт, Ази тивийн аварга, МУГТ Л.Энхрийлэн, ДАШТ-ий хүрэл медальт, ОУХМ Б.Ганхайч нар өрсөлдөх юм.  МУГТ Л.Энхрийлэн 63 кг-ын бүх тамирчдыг тэргүүлэн “А” хэсгийн нэгдүгээр тойрог гоц мөргөн ялалт авсан байгаа. Хэсгийн аваргын төлөөх барилдаанд ОХУ болон Тажикстаны бөхчүүдийн хэн ялсантай барилдах юм. Харин ОУХМ Б.Ганхайч “С”хэсгийн нэгдүгээр тойрогт гоц мөргөн ялалт авсан байгаа. Хэсгийн аваргын төлөөх барилдаанд Киргизстан, Хятадын тамирчдын хэн ялсантай барилдана.

ЭМЭГТЭЙЧҮҮДИЙН 70 КГ-ЫН ЖИНД У.АНУЖИН

Эмэгтэйчүүдийн 70 кг-ын жинд “Женко” клубийн залуу тамирчин, Уран-Өлзийн Анужин барилдана. Энэ жинд 16 тамирчин байгаа. У.Анужин “D” хэсгийн нэгдүгээр тойрогт Германы Tayla GRAUER-тай барилдана. Хэрэв түүнийг буулган авч чадвал хэсгийн аваргын төлөөх барилдаанд ОХУ, Австрийн бөхчүүдийн хэн ялсан таарна.

 ЭМЭГТЭЙЧҮҮДИЙН -78 КГ-ЫН ЖИНД О.ХҮСЛЭН

    Эмэгтэйчүүдийн -78 кг-ын жинд 11 тамирчин өрсөлдөнө. Манай улсаас тус жинд ОУХМ О.Хүслэн барилдах юм. Тэрбээр “А” хэсгийн нэгдүгээр тойрогт Нидерландын Marit KAMPS-тай барилдана. Хэрэв түүнийг ялж чадах юм бол хэсгийн аваргын төлөөх барилдаанд АНЭУ-ын Yelyzaveta  LYTVYNENKO-той таарна.

 ЭМЭГТЭЙЧҮҮДИЙН +78 КГ-ЫН ЖИНД А.АДЪЯАСҮРЭН, Д.НОМИНЗУЛ

Эмэгтэйчүүдийн +78 кг-ын жинд 12 тамирчин байна. Манай улсаас ОУХМ А.Адъяасүрэн, ОУХМ Д.Номинзул нар барилдана. Тэд нэг хэсэгт сугалаа татсан байгаа. Д.Номинзул “В” хэсгийн нэгдүгээр тойрогт гоц мөргөн ялалт авсан. Хэсгийн аваргын төлөөх барилдаанд А.Адъяасүрэн, Узбекистаны Mokhlaroyim TUKHTAMISHEVA нарын хэн ялсантай барилдана. Харин ОУХМ А.Адъяасүрэн “В” хэсгийн нэгдүгээр тойрогт  Узбекистаны Mokhlaroyim TUKHTAMISHEVA-тай таарсан. Хэрэв түүнийг ялж чадах юм бол хэсгийн аваргын төлөөх барилдаанд ОУХМ Д.Номинзултай барилдах юм.

Үргэлжлэл бий.