Монголчуудыг дэлхийн тавцанд өндөрт өргөдөг үнэт зүйлсийн нэг бол яахын аргагүй спорт, тэр дундаа чөлөөт бөхийн спорт билээ. 1968 оны Мехикогийн олимпоос БНМАУ анхны олимпын медалиудаа хүртэж, эх орныхоо нэрийг дэлхийд дуурсгасан түүхтэй.

   Тус түүхэн амжилтын эзэд нь Монгол Улсын Хөдөлмөрийн баатар, Дархан аварга, олимпын мөнгөн медальт Жигжидийн Мөнхбат, олимпын хүрэл медальт Хөдөлмөрийн баатар Чимэдбазарын Дамдиншарав, олимпын хүрэл медальт Хөдөлмөрийн баатар Данзандаржаагийн Сэрээтэр, мөн олимпын хүрэл медальт МУГТ Төмөрийн Артаг нар юм.

    Эдгээр алдарт тамирчдын нэрэмжит болгон мөн Монголын үндэсний олимпын хорооны 70 жилийн ойг тохиолдуулан 2026 оны “U15”, “U20”  насны өсвөр үе, залуучуудын ангиллын улсын аварга шалгаруулах тэмцээнийг зохион байгуулж буй энэ жилийн тэмцээний онцлог болж байгаа юм.

   Энэхүү тэмцээн нь өсвөр, залуу үеийнхэндээ түүх, бахархлаа таниулж, алтан үеийн алдарт тамирчдаа алдаршуулах өндөр чухал ач холбогдолтой юм. Тэмцээн 2026 оны дөрөвдүгээр сарын 23–26-ны өдрүүдэд Спортын төв ордны “А” танхимд зохион байгуулагдаж өндөрлөх юм.