Жүдо бөхийн Ази аварга шалгаруулах тэмцээн маргааш буюу 2026 оны дөрөвдүгээр сарын 16-ны өдөр  БНХАУ-ын Өвөр Монголын Өөртөө Засах орны Ордос хотод эхэлнэ. Энэ удаагийн Азийн аваргад 19 орны эрэгтэй 108, эмэгтэй 89, нийт 197 тамирчин өрсөлдөнө. Өнөөдөр Азийн аваргын сугалаа явагдаж, оноолт гарлаа. Насанд хүрэгчдийн Ази тивийн аварга шалгаруулах тэмцээн энэ сарын 16-18-ны өдрүүдэд  явагдаж өндөрлөнө. Урьдчилсан барилдаанууд 11.00 цагаас, финалын барилдаан 16:00 цагаас эхэлнэ.

ЭМЭГТЭЙЧҮҮДИЙН 48 КГ-Д Ж.АНУДАРЬ

     Эмэгтэйчүүдийн 48 кг-ын жинд 15 тамирчин барилдана. Өсвөр үеийн ДАШТ-ий мөнгөн медальт, “Душанбе-2025” гранд сламын аварга, Ж.Анударь “D” хэсгийн нэгдүгээр тойрогт Казахстаны Diana BURKEYEVA-тай таарсан. Хэрэв түүнийг ялах юм бол хэсгийн аваргын төлөө Вьетнам, Хонконгийн тамирчдын хэн ялсантай барилдана.

ЭМЭГТЭЙЧҮҮДИЙН 52 КГ-Д М.НАНДИН-ЭРДЭНЭ

Эмэгтэйчүүдийн 52 кг-ын жинд 12 тамирчин барилдана. Өсвөр үеийн ДАШТ-ий хүрэл медальт, их дуулгын мөнгөн медальт, М.Нандин-Эрдэнэ “С” хэсгийн нэгдүгээр тойрогт гоц мөргөн ялалт авсан байгаа. Хэсгийн аваргын төлөө Япон. Тайванийн тамирчдын хэн ялсантай барилдана.

АНЭУ-ын нэр дээр барилдаж буй Ази тивийн аварга, ОУХМ Б.Хорлоодой 52 кг-ын жингийн бөхчүүдийг толгойлон “А”хэсгиййн нэгдүгээр тойрогт гоц мөргөн ялалт авсан байгаа. Хэсгийн аваргын төлөө Хятад, Хойд Солонгосын бөхчүүдийн хэн ялсантай нь барилдана.

ЭМЭГТЭЙЧҮҮДИЙН 57 КГ-Д Т.АРИУНЗАЯА, М.ЦЭНДБАЗАР

Эмэгтэйчүүдийн 57 кг-ын жинд 16 тамирчин барилдана. Манай улсаас өсвөр үеийн дэлхийн аварга ОУХМ М.Цэндбазар, өсвөр үеийн дэлхийн аварга, “Токио-2024” их дуулгын хүрэл медальт, ОУХМ Т.Ариунзаяа, нар өрсөлдөнө.  М.Цэндбазар “А” хэсгийн нэгдүгээр тойрогт Узбекистаны Shukurjon AMINOVA-той таарсан. Хэрэв түүнийг ялж, чадах юм бол хэсгийн аваргын төлөөх барилдаанд Хойд Солонгос, АНЭУ-ын тамирчдын хэн ялсантай барилдана.

Т.Ариунзаяа “С”хэсгийн нэгдүгээр тойрогт Өмнөд Солонгосын SHIN Yuna-тай таарсан. Хэрэв түүнийг буулган авч чадвал хэсгийн аваргын төлөө Киргизстан, Вьетнамын тамирчдын хэн ялсантай хүч сорино.

ЭМЭГТЭЙЧҮҮДИЙН 63 КГ-Д Л.ЭНХРИЙЛЭН

    Эмэгтэйчүүдийн 63 кг-ын жинд13 тамирчин барилдана. ДАШТ-ий хошой хүрэл медальт, Ази тивийн аварга, МУГТ Л.Энхрийлэн 63 кг-ын жингийн бүх бөхчүүдийг толгойлон “А” хэсгийн нэгдүгээр тойрогт гоц мөргөн ялалт авсан байгаа. Хэсгийн аваргын төлөөх барилдааныг Киргизстан, Энэтхэгийн тамирчдын хэн ялсантай хийнэ.

ЭМЭГТЭЙЧҮҮДИЙН 70 КГ-Д С.ЛХАГВАДУЛАМ

   Эмэгтэйчүүдийн 70 кг-ын жинд 11 тамирчин барилдана. ОУХМ С.Лхагвадулам “С” хэсгийн нэгдүгээр тойрогт Казахстаны Azhar ASKHAT-тай таарсан. Хэрэв түүнийг ялж чадах юм бол хэсгийн аваргын төлөө Тайванийн Yu-Jung LIAO-той өрсөлдөнө.

ЭМЭГТЭЙЧҮҮДИЙН -78 КГ-Д О.ХҮСЛЭН, Ж.УРАНГОО

   Эмэгтэйчүүдийн -78 кг-ын жинд 11 тамирчин барилдана. Залуу тамирчин Ж.Урангоо “А” хэсгийн нэгдүгээр тойрог Өмнөд Солонгосын LEE Jeongyun-тай таарсан. Хэрэв түүнийг ялж, чадах юм бол хэсгийн аваргын төлөө АНЭУ-ын Yelyzaveta LYTVYNENKO-той барилдана.

   ОУХМ О.Хүслэн “D” хэсгийн нэгдүгээр тойрогт Казахстаны Aruna JANGELDINA-тай таарсан. Түүнийг буулган авч чадвал хэсгийн аваргын төлөө Хятадын Hongtao WU-той өрсөлдөнө.

ЭМЭГТЭЙЧҮҮДИЙН +78 КГ-Д А.АДЪЯАСҮРЭН

Эмэгтэйчүүдийн +78 кг-ын жинд 11 тамирчин өрсөлдөнө. ОУХМ А.Адъяасүрэн “В” хэсгийн нэгдүгээр тойрогт гоц мөргөн ялалт авсан байгаа. Хэсгийн аваргын төлөө Узбекистаны Umida NIGMATOVA-тай барилдана.

ЭРЭГТЭЙЧҮҮДИЙН 60 КГ-Д Т.ТҮМЭНЖАРГАЛ

     Эрэгтэйчүүдийн 60 кг-ын жинд18 тамирчин барилдана. Залуу тамирчин Т.Түмэнжаргал “А” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Хойд Солонгос, Өмнөд Солонгосын жүдочдын хэн ялсантай барилдах юм.

ЭРЭГТЭЙЧҮҮДИЙН 66 КГ-Д Ө.ЖАНЦАНДОРЖ, К.ЁОЛК

   Эрэгтэйчүүдийн 66 кг-ын жинд 15 тамирчин барилдана. Залуу тамирчин Ө.Жанцандорж “А”хэсгийн нэгдүгээр тойрог Киргизстаны Adis OROZMAMATOV-той таарсан. Түүнийг ялж чадах юм бол хэсгийн аваргын төлөө Тажикстаны Nurali EMOMALI-тай барилдана.

    ДАШТ-ий хүрэл медальт, ОУХМ К.Ёолк  “С” хэсгийн нэгдүгээр тойрогт АНЭУ-ын нэр дээр барилдаж буй ОУХМ Б.Нармандахтай таарсан. Хэрэв түүнийг ялж чадах юм бол хэсгийн аваргын төлөөх барилдаанд Тажикстан, Хойд Солонгосын бөхчүүдийн хэн ялсан өрсөлдөнө.

ЭРЭГТЭЙЧҮҮДИЙН 73 КГ-Д О.УРАНБАЯР

   Эрэгтэйчүүдийн 73 кг-ын жинд 18 тамирчин барилдана. ОУХМ О.Уранбаяр “D” нэгдүгээр тойрогт гоц мөргөн ялалт авсан байгаа. Хоёрдугаар тойрогт Өмнөд Солонгос, Узбекистаны бөхчүүдийн хэн ялсантай өрсөлдөнө.

ЭРЭГТЭЙЧҮҮДИЙН 81 КГ-Д О.ШИНЭБАЯР

    Эрэгтэйчүүдийн 81 кг-ын жинд 18 тамирчин барилдана. О.Шинэбаяр “А” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Тажикстаны Somon MAKHMADBEKOV-той таарсан. Хэрэв түүнийг буулган авч чадвал хэсгийн аваргын төлөө Өмнөд Солонгос, Бахрейны бөхчүүдийн хэн ялсантай барилдах юм.

ЭРЭГТЭЙЧҮҮДИЙН 90 КГ-Д А.МӨНХ-ЭРДЭНЭ

    Эрэгтэйчүүдийн 90 кг-ын жинд 15 тамирчин барилдана.  Манай улсаас А.Мөнх-Эрдэнэ “D” хэсгийн нэгдүгээр тойрогт Тажикстаны  Muhammadjon ABDUJALILZODA-тай таарсан. Хэрэв түүнийг буулган авч чадвал хэсгийн аваргын төлөө Киргизстан, Макаугийн бөхчүүдийн хэн ялсантай нь барилдах юм.

ЭРЭГТЭЙЧҮҮДИЙН -100 КГ-Д Т.ГАН-ЭРДЭНЭ

   Эрэгтэйчүүдийн -100 кг-ын жинд 14 тамирчин барилдана. Манай улсаас Т.Ган-Эрдэнэ“С” хэсгийн нэгдүгээр тойрогт Хятадын Fuchun HUANG-тай таарсан. Хэрэв түүнийг ялж чадах юм бол хэсгийн аваргын төлөө Тажикстаны Dzhakhongir MADZHIDOV-той өрсөлдөнө.

ЭРЭГТЭЙЧҮҮДИЙН +100 КГ-Д О.ЦЭЦЭНЦЭНГЭЛ, Ө.ПЭРЭНЛЭЙЖАМЦ

    Эрэгтэйчүүдийн +100 кг-ын жинд 10 тамирчин барилдана. Ө.Пэрэнлэйжамц “А” хэсгийн нэгдүгээр тойрогт Тайваний DAI You-Ming-тай таарсан. Хэрэв түүнийг ялж чадах юм бол хэсгийн аваргын төлөө Узбекистаны Alisher YUSUPOV-той  барилдана.

 ОУХМ О.Цэцэнцэнгэл “D” хэсгийн нэгдүгээр тойрогт гоц мөргөн ялалт авсан байгаа. Хэсгийн аваргын төлөө Хятадын Haiyang LI-тай таарсан. Түүнийг ялах юм бол хэсгийн аварга бол шөвгийн дөрөвт шалгарч үлдэнэ.