Монголын үндэсний олимпын хорооны түүхт 70 жилийн ойн хүрээнд Сонгинохайрхан дүүргийн ерөнхий боловсролын сургуулийн багш, дасгалжуулагчдыг хамруулсан олимпын үнэт зүйлсийн боловсролын (OVEP) хөтөлбөрийн ээлжит танилцуулах сургалтыг амжилттай зохион байгууллаа.

     Уг арга хэмжээнд ОУОХ-ны гишүүн, МҮОХ-ны ерөнхийлөгч Б. Баттүшиг, ЦХИХХ-ны сайд, МҮОХ-ны гишүүн Ч. Номин болон Сонгинохайрхан дүүргийн боловсролын хэлтэс, Биеийн тамир, спортын газрын төлөөллүүд оролцлоо. Тус сургалтын үеэр МҮОХ-ны ерөнхийлөгч Б.Баттүшиг нь өсвөр, залуучуудыг зөвхөн спортын ур чадвараар бус, олимпын үнэт зүйл, манлайлал, боловсролын чиглэлээр хөгжүүлэхэд онцгой анхаарч ажиллаж буйг онцлов.

    Тэрбээр OVEP хөтөлбөртэй 2018 онд Аргентин улсын Буэнос-Айрес хотноо болсон Залуучуудын олимпын наадмын үеэр анх танилцаж, Монгол Улсад нэвтрүүлэх санаачилгыг гаргасан бөгөөд 2022 оноос эхлэн уг хөтөлбөрийг эх хэлнээ орчуулж, сургагч багш нарыг бэлтгэн, ерөнхий боловсролын сургуулиудад үе шаттайгаар хэрэгжүүлж байгааг дурдлаа.

    OVEP хөтөлбөр нь хүүхэд, өсвөр үеийнхэнд хичээл зүтгэл, шударга өрсөлдөөн, бусдыг хүндлэх, өөрийгөө хөгжүүлэх эрмэлзэл, бие–сэтгэл–оюуны тэнцвэр зэрэг олимпын үнэт зүйлсийг төлөвшүүлэхэд чиглэсэн орчин үеийн боловсролын арга зүй юм. Мөн энэхүү хөтөлбөр нь дэлхийн 60 гаруй улсад амжилттай хэрэгжиж байгаа ОУ-ын томоохон хөтөлбөр юм.

    Цаашид уг хөтөлбөрийг бүх ерөнхий боловсролын сургуулиудад үе шаттайгаар нэвтрүүлж, олимпын танхимын үйл ажиллагааг идэвхжүүлэх зорилт тавин ажиллаж байна. Тус сургалтын үеэр биеийн тамир, спортыг хөгжүүлэх үйлсэд оруулж буй хувь нэмрийг үнэлж зарим багш нарыг МҮОХ-ны 70 жилийн ойн медалиар шагнав.