Орхон аймгийн Эрдэнэт хотын түүхт 50 жилийн ой, улсын заан цолтой бөхчүүдэд хүндэтгэл үзүүлэх улс, аймаг, цэргийн цолтой 128 бөхийн барилдаанд Төв аймгийн Өндөрширээт сумын харьяат, "Сүлд" спорт хороо, “Заамар-Өгөөмөр Хайрхан” ХХК, “Дорнын-Өртөө” ХХК, “Батхаан Транс” ХХК, “Нэгдэл” клуб, ШШГЕГ 427-р анги, "Дүнжингарав" дэвжээний бөх, улсын заан Доржхандын Хүдэрбулга түрүүллээ.

      Харин Өвөрхангай аймгийн Төгрөг сумын харьяат, “Нутгийн Буян” групп, Барилга инженерийн цэргийн удирдах газар, "Их Монголын Хүчтэн" дэвжээний бөх, улсын арслан Цэдэнсодномын Бямба-Отгон үзүүрлэв. Шөвгийн дөрөвт Төв аймгийн Баянхангай сумын харьяат, "Алдар" спорт хороо, зэвсэгт хүчний119 анги, “Монгол” групп, "Дүнжингарав" дэвжээний бөх, улсын заан Б.Батмөнх, Дорнод аймгийн Дашбалбар сумын харьяат, "Аврагч" спорт хороо, “Бүрэн Дуулга” ХХК, “Цагаан Сор” ХХК, “Гэгээн Хэрлэн” ХХК, "Дорнын Хүчтэн" дэвжээний бөх, улсын заан Д.Анар нар шалгарлаа.

    Шөвгийн наймд улсын харцага Х.Гантулга, улсын харцага Э.Ууганбаяр, улсын өсөх идэр начин Б.Түмэндэмбэрэл, улсын начин Т.Довчинсэмбээ нар үлдэв. Тус барилдааны түрүү бөх 20 сая, үзүүр бөх 10 сая, их шөвгийн бөхчүүд тус бүр таван сая төгрөгийн бай шагнал гардсан бол үзэгчдийн дундаас супер азтан нэг хүн 5.000.000 төгрөг, таван азтан тус бүр 1.000.000 төгрөг гардсан юм. Дараагийн барилдаан дөрөвдүгээр сарын 18-19-ний өдрүүдэд “Алтан цом”-ын төлөөх шигшээ барилдаануудаар үргэлжилнэ.