Сансрын нисгэгч Ж.Гүррагчаа баатар “Сансар цом -2026” тэмцээнд хүрэлцэн ирж, шагнал гардууллаа . Монгол хүн анх удаа сансарт ниссэн түүхэн өдрийг тохиолдуулан жил бүр “Сансар цом-2026” тэмцээнийг Монголын хөл бөмбөгийн холбооны футзалын ордонд зохион байгуулдаг уламжлалтай. Энэ удаагийн тэмцээнд нийт 27 багийн 320 гаруй тамирчин оролцож, 50, 55, 60, 65 насны дөрвөн ангилалд өрсөлдөн аваргуудаа тодруулсан юм.

     Монгол Улс, ЗХУ-ын баатар, сансрын нисгэгч Жүгдэрдэмидийн Гүррагчаа МХБХ-нд хүрэлцэн ирж, ерөнхий нарийн бичгийн дарга С.Оюунчимэгтэй уулзав. Уулзалтаар “Сансар цом” тэмцээнийг амжилттай зохион байгуулахад МХБХ-наас дэмжлэг үзүүлж, хамтран ажилладагт талархал илэрхийлж, анх сансарт нисэхдээ сууж явсан хөлгийн дурсгалын загварыг бэлэглэв. “Сансар цом 2026” тэмцээний шагнал гардуулах ёслолын арга хэмжээнд нэр хүндтэй зочид оролцож, шилдэг баг тамирчдад медаль, алтан цомыг гардуулан өглөө.