Киргизстаны Бишкек хотод "Бишкек-2026" чөлөөт, сонгомол бөхийн Ази тивийн аварга шалгаруулах тэмцээн үргэлжилж байна. Өчигдөр Азийн аваргын эмэгтэйчүүдийн таван жингийн барилдаанууд явагдсан. Монголын бөхчүүдээс ОУХМ Э.Даваанасан алтан медалийн төлөө барилдахаар шалгарч үлдсэн. Мөн ОУХМ Э.Дэлгэрмаа, залуу тамирчин О.Ариунзаяа нар хүрэл медалийн төлөө хүч сорихоор, Б.Мөнхнар дагаж барилдахаар боллоо.

      Эмэгтэйчүүдийн 50 кг-ын жинд Японы Юи Сүсаки, Хойд Солонгосын Ким Сон Хян нар аваргын төлөө барилдана. Тэд өмнө нь 2017 оны Азийн аваргын шигшээ барилдаанд хүч сорьж байв. Дэлхийн аваргын дөрвөн түрүүтэй, Азийн хошой аварга Юи Сүсаки "Парис-2024" олимпын наадмаас хойших анхны тэмцээндээ оролцож байна. Харин ДАШТ-ий хүрэл, Азийн наадмын мөнгө, хүрэл медальт Ким Сон Хянд есөн жилийн дараа алдарт аваргатай даагаа нэхэх боломж тохиолоо.

      Эмэгтэйчүүдийн 55 кг-ын жинд өмнөх жилийн Азийн аваргаас мөнгөн медаль авсан Ли Юшюань болон шинээр тодорч байгаа "Од" Сүвака Үчида нар аваргын төлөө хүч сорино. Үчида “U17” ангиллын дэлхийн аваргад хоёр удаа, “U20” ангиллын дэлхийн аваргад нэг удаа түрүүлсэн. Улмаар өнгөрсөн онд насанд хүрэгчдийн ДАШТ-ээс анхны медалиа аваад байгаа юм. Харин Хятадын тамирчин дутуугаа гүйцээж, аварга болох зорилготой. Эдгээр бөхчүүд финал хүртэлх замдаа ердөө ганцхан оноо алдсан байна.

     Эмэгтэйчүүдийн 59 кг-ын жинд Японы Сэна Нагамото болон Хятадын Шиэ Мэнгю нар финалдлаа. Нагамото шинээр тодорч байгаа залуу "Од" бол харин Хятадын Мэнгю 2019 оны Азийн аваргад түрүүлж байсан. Өнгөрсөн жил Азийн аваргаас хүрэл медаль хүртсэн хашир туршлагатай тамирчин юм.

     Эмэгтэйчүүдийн 68 кг-ын финалд дэлхийн хошой аварга, олимпын хошой медальтантай хүч сорино. Японы Мива Морикава хэдийгээр Азийн аваргын 68 кг-ын жинд анх удаагаа барилдаж байгаа боловч шинэ жиндээ ч түүртэлгүй илүүрхсээр шигшээд хүрээд байна. Харин олимпын хошой медальт, Киргизстаны Мээрим Жуманазарова, өнгөрсөн 2025 оны Азийн аварга Ли Жэлүг нутгийн дэвжээнээ буулгаж авсан. Жуманазарова 2021 онд Алматад түрүүлж, 2022 онд Улаанбаатарт үзүүрлэснээсээ хойш тивийн аваргад ахин финалдсан нь энэ юм. Харин Морикава тивийн аваргад финалдах бүрийдээ түрүүлж байв.

     Эмэгтэйчүүдийн 76 кг-ын жинд ДАШТ-ий мөнгөн медальт Э.Даваанасан, дэвжээний эзэн орон Киргизстаны хүчтэн Айпери Медет Кызытэй барилдахаар шигшээ барилдаанд шалгараад байна. Киргизстаны Айпери Медет Кызы Азийн аваргад дөрөв дэхээ, сүүлийн гурван жилд дараалан түрүүлэхээр зорьж байгаа. Харин Э.Даваанасан тивийн аваргаас хошой хүрэл медаль хүртэж байсан. Анх удаагаа финалдаад байна. Дэлхийн медальтнуудын өрсөлдөөн олны анхаарлын төвд өрнөх нь гарцаагүй юм.