Монголын үндэсний олимпын хорооны түүхт 70 жилийн ой тохиож байна. Монгол Улсынхаа нэрийг олимпын их тавцанд анх дуурсгаж, чөлөөт бөхийн төрлөөр эх орондоо анхны медалийн буухиаг авчирсан домогт алдартнууд Ж.Мөнхбат, Ч.Дамдиншарав, Д.Сэрээтэр, Т.Артаг нарын нэрэмжит 2026 оны  “U15”, “U20” насны улсын аварга шалгаруулах тэмцээн зохион байгуулагдах гэж байна.

    Чөлөөт бөхийн “U15” ангиллын УАШТ-ий хөвгүүд 38,41, 44, 48, 52, 57, 62, 68, 75, 85 кг, охид 33, 36, 39, 42, 46, 50, 54, 58, 62, 66 кг-ын жингийн  ангиллаар өрсөлдөнө. Харин “U20” насны эрэгтэйчүүд 57, 61, 65, 70, 74, 79, 86, 92, 97, 125 кг, эмэгтэйчүүд 50, 53, 55, 57, 59, 62, 65, 68, 76 кг-ын жингийн ангиллаар өрсөлдөх юм.

   Энэ тэмцээн бол Монголын чөлөөт бөхийн алтан үеийн түүх, ялалтын бахархалт замнал, үе үеийн аваргуудын суу алдрыг залгамжлах шинэ цагийн эхлэл юм. Олимп, дэлхийн дэвжээнд эх орныхоо нэрийг өндөрт өргөсөн аугаа аваргуудын мөрийг өнөө цагийн өсвөр, залуу бөхчүүд үргэлжлүүлж, маргаашийн тив, дэлхийн аварга, олимпын медальтнуудын шинэ түүх энэ дэвжээнээс эхлэн бичигдэх болно.