Боловсролын салбарын удирдах ажилтны шуурхай зөвлөгөөн өнөөдөр боллоо. “Боловсролыг дэмжих жил-2026”-гийн зорилт, хэрэгжүүлэх арга хэмжээ, 2026 онд салбарын хэмжээнд хүрэх үр дүнгийн талаар нэгдсэн ойлголтод хүрлээ. Мөн орон нутагт тулгамдаж буй асуудлуудын гарц шийдлийг хэлэлцэв.  Боловсролын яам, Боловсролын ерөнхий газар, Нийслэлийн боловсролын газар, харьяа байгууллагуудын удирдлага, нэгжийн дарга нар, 21 аймгийн Боловсролын газрын дарга, есөн дүүргийн хэлтсийн дарга нар энэхүү шуурхай зөвлөгөөнд оролцов.

     Зөвлөгөөний эхэнд Боловсролын сайд П.Наранбаяр боловсролын салбарын бодлого, “Боловсролыг дэмжих жил”-ийн зорилт, хэрэгжүүлэх арга хэмжээний талаар илтгэл тавьж, салбарын шинэчлэлийн чиглэлийг танилцууллаа. Мөн Боловсролын дэд сайд Д.Гантулга “Багшлахаас суралцахуйд шилжих боловсролын парадигмийн шилжилт” илтгэл тавилаа.

    Үүнээс гадна боловсролын салбарын бодлого, төлөвлөлт, 2026 онд хүрэх үр дүнг хэлэлцэв.  Дээд болон мэргэжлийн боловсролын бодлого, хэрэгжилтийн арга хэмжээ, сургуулийн өмнөх болон ерөнхий боловсролын бодлого, зохицуулалтын талаар ярилцлаа. 2026 оны батлагдсан төсөв, цаашдын бодлого, анхаарах асуудлыг хэлэлцэв.

     Салбарын хяналт, шинжилгээ, үнэлгээ, дотоод аудитын чиглэлээр хэрэгжүүлэх арга хэмжээ зэрэг асуудлаар холбогдох газрын дарга нар мэдээлэл хийж, оролцогчид санал солилцов. Зөвлөгөөнөөр боловсролын салбарын бодлого, хэрэгжилтийн уялдаа холбоог сайжруулах, 2026 онд дэвшүүлсэн зорилтуудыг үр дүнтэй хэрэгжүүлэхэд салбар нэгж бүр анхаарч ажиллахаар болов.