Монгол Улсаас АНУ-д суугаа Элчин сайд Ө.Батбаяр дэлхийн нэр хүндтэй зургаан марафон болох Бостон, Берлин, Лондон, Чикаго, Нью-Йорк, Токио марафонд амжилттай оролцож хос “6- Одот” медаль хүртсэн анхны Монгол марафонч Х.Алимааг хүлээн авч уулзан баяр хүргэв.

   Уулзалтын үеэр Элчин сайд Ө.Батбаяр Монголын тамирчин дэлхийн спортын томоохон тэмцээнүүдэд амжилттай оролцож, эх орныхоо нэрийг олон улсын тавцанд өндөрт өргөж байгааг онцлон тэмдэглэж, цаашдын спортын замналд нь амжилт хүсэв.

   Х.Алимаа нь 2026 оны гуравдугаар сарын 1-ний өдөр Япон Улсын Токио хотноо зохион байгуулагдсан марафонд амжилттай оролцсоноор “6-Одот” медалийг хоёр дахь удаагаа хүртэж, дэлхийн их зургаан марафонд хоёр удаа бүрэн амжилттай оролцсон анхны Монгол хүн болсон бахархам амжилтыг үзүүлээд байна.

   Мөн тэрээр өнөөдрийн байдлаар албан ёсны бүтэн марафоны зайг нийт 39 удаа амжилттай туулсан бөгөөд үүнээс 16 удаагийн марафоныг Дэлхийн их зургаан марафоны хүрээнд гүйсэн амжилттай байна.