Хүндийг өргөлтийн Ази тивийн аварга шалгаруулах тэмцээн ирэх тавдугаар сарын 12-17-ны өдрүүдэд Энэтхэг Улсын Гандинагар хотод болох ёстой байсан юм. Гэтэл Ойрхи Дорнод болон Персийн булангийн бүс нутагт үүсээд буй нөхцөл байдлын улмаас тэмцээний хугацааг хойшлуулах шийдвэрийг Азийн хүндийг өргөлтийн холбооноос гаргажээ.

   Энэ тэмцээнд манай улсаас үндэсний шигшээ багийн дасгалжуулагч Ч.Мартын удирдлагад дөрвөн тамирчин оролцохоор бэлтгэлээ базааж байна. Эмэгтэйчүүдийн 63 кг-ын жинд олон улсын хэмжээний мастер Б.Хонгорзул, +86 кг-д дэд мастер Г.Чинболор, эрэгтэйчүүдийн 79 кг-д спортын мастер И.Амарсанаа, 88 кг-д У.Мөнхбаяр өрсөлдөх ажээ.

   Түүнчлэн олон улсын II зэрэглэлийн шүүгч О.Баярцэцэг, Б.Гантулга, Монголын хүндийг өргөлтийн холбооны ерөнхий нарийн бичгийн дарга, олимпын зэрэглэлийн шүүгч О.Одгэрэл нар ажиллах юм байна. Одоогийн байдлаар үндэсний шигшээ багийнхан ОУХМ Б.Энхжин, Л.Болортуяа, Б.Хонгорзул, дэд мастер Г.Чинболор, спортын мастер И.Амарсанаа, У.Мөнхбаяр, О.Оюунжаргал, Б.Отгонтуул гэсэн бүрэлдэхүүнтэйгээр Архангай аймгийн "АРА арена"-д нэгдсэн бэлтгэл хийж байгаа юм. Харин ОУХМ, шигшээ багийн дасгалжуулагч Г.Анужингаар удирдуулсан залуучуудын шигшээ багийнхан нийслэлд бэлтгэлээ базааж байгаа аж.