Хүүхэд, залуучуудад спорт, олимпизмыг сурталчлах, олимпын үнэт зүйлсийг таниулах зорилгоор спортын алдартантай уулзуулж, тэдний амжилтаар бахархах, цаашлаад спортоор хичээллэх дур сонирхолтой болгох зорилгоор “Спортын алдартан бидний бахархал” уулзалт ярилцлагыг тогтмол зохион байгуулдаг билээ.

    МҮОХ-ны түүхт 70 жилийн ойн хүрээнд энэ удаагийн арга хэмжээ Өмнөговь аймгийн Даланзадгад хотод зохион байгуулагдав. Өмнөговь аймгийн “Афин” олимпын зөвлөлөөс зохион байгуулсан тус арга хэмжээнд “Мехико 1968” олимпын наадмын хүрэл медальт, Монгол Улсын Хөдөлмөрийн баатар, Ардын багш, гавьяат тамирчин Ч.Дамдиншарав оролцлоо.

    Тэрбээр амжилтад хүрэхэд шаргуу хөдөлмөр, сахилга бат, зөв хандлага чухал талаар сурагчдад үнэтэй зөвлөгөө өгөн, өөрийн туршлагаасаа хуваалцсан нь сурагчдад өөрийгөө хөгжүүлэх, спортоор хичээллэн зорилгоо тодорхойлоход урам зориг өгч, тэдний хүсэл мөрөөдөлд эерэг нөлөө үзүүлнэ гэдэгт итгэлтэй байна.